Kângmei Ven Hapta hawn a ni Kângmeiin ram hectare 3,614 a nghawng

Chief Secretary chuan, "Mizo­ram hi India state tê zinga ram­ngaw nei ṭha pawl ber a nih laiin, ram vah leh thing kiha lo leh huan siama eizawng an la tam avangin ram hi a bua telh telh. Lo atana kan vah bâk ram pawh a kâng fo a ni," a ti a, fimkhur loh avanga ram kâng a tam thu a sawi.

Kângmei vên kawngah YMA leh VC-ten sorkar hmalakna an ṭawiawm ṭhat thu sawiin Lalnunmawia chuan, "Thawhho­na ṭha a awm zel ka beisei. Hapta puala hmalakna leh zirtirnate'n kângmei vèn kawngah kawng ro a sû a, awareness pawh tun aia nasa leh zawka kan beih a ngai. Mi tinin theihtawp kan chhuah a pawimawh a ni," a ti.

Principal chief conservator of forest (PCCF) Liandawla pawhin thu sawiin, kumina Kangmei Ven Hapta hman dan leh hmalak tum dan a sawifiah. Kumina Kangmei Ven Hapta thupui chu ‘Kângmei tichhuak lo turin mi tin i fimkhur ang u’ tih a ni. 

Inkhawma tarlan danin, kum 2020 chhung khan Mizoramah hmun 1,300 chuangah kângmei a chhuak a, chung zinga hmun 210 chu ramngaw kâng niin, a bâk 1,090 chu lo leh huan hâlte leh bawlhhlawh hâlna hmunte a ni. Kangmei chhuakin ram a tihchhiat leh nghawng chu hectare 3,614-a zau a ni a, hectare 289 chu ramngaw kâng a ni.

Champhaia Fire Prevention Week hawnna hmanpuitu EFCC Minister chuan, Mizoram chu tláng ram, nipui laia ro tak a nih avangin chenna in leh ram kâng a tam ṭhin tih sawiin, "Survey of India-in satellite hmanga thla a lâk aṭanga a lan danin, India rama state zingah ram tikâng nasa ber pawl kan ni. Chhungkaw tam takin tláng ram lo neih hi eizawnna atan hmang mah se, buh leh thlai chìnna atana vah ni lo ram kâng ṭhinte kan vên a ṭul tak zet," a ti. 

TJ Lalnuntluanga chuan, ram leh khawtlang hruaitute leh department hotu kal khawmte chu kângmei chhuak ṭhin vèn leh a pawi dante mipui zirtir ṭhin tura chahin, "Ram dinhmun leh kângmei vèn pawimawhnate hre thar leh ang u," a ti a; ramngaw hâl leh tihchereu chu ram budget tlakchhiattirtu pakhat a nih thu a sawi. 

Nimin khan Mizoram hmun hrang hrangah Kângmei Vên Hapta - Fire Prevention Week hawn a ni a, February 13-ah khâr a ni ang. Thupui chu ‘Kângmei tichhuak lo turin mi tin i fimkhur ang u’ tih a ni.

Lungleiah chuan District Level Fire Prevention Committee hmalaknain Convention Centre-ah Bamboo Development Board vice chairman Dr K Pachhunga, MLA-in a hawng. Dr K Pachhunga chuan, "Ram kan tihkan hian keimahni kan inhâl a, Pathian thu awih lohna a ni. Kan ram hi hnam dangte'n min vensak dawn lo a, kan rama thing leh maute leh nungchate humhalh kawngah mi tinin mawhphurhna kan nei," a ti.

Lunglei district mipuite'n Ram tikang lo tura  invenna dan The Mizoram Prevention and Control of Fire in the Village, Rules 2001 an zawm ngei theih nan VC, YMA leh kohhran hrang hrangte nen ṭang rualin hmalak tum a ni a; tlangau, banner, chanchinbu leh visual media-te kaltlangin mipui hnenah zirtirna kalpui tum a ni.

Champhaiah pawh District Level Fire Prevention Committee buatsaihin Kahrawt Field-ah hawn a ni a, khuallian, EFCC minister TJ Lalnuntluanga'n kangmei vên kawnga inzirtirna video clip a tlangzarh.

Inkhawm hi district bawrhsap Maria CT Zuali'n a kaihruai a; district forest officer Lalduhthlana sawi danin, kuminah Champhai district-ah kângmei ṭum thum chhuak tawhin, Hlawnchindum hnára thleng vek a ni a, ram hectare 65 vela zau kângin, Champhai Police Station-ah FIR thehluh a ni.

Fire & Emergency Services station officer F Lalchhandama sawi danin, kum 2019-20 chhungin Champhai khawpui huam chhungah in pali, chhungkaw paruk luah lai a kâng a, cheng nuai 10.71 hû a kâng ral. Kum 2020-21 chhungin in pahnih a kâng tawh a, bungrua cheng nuai 3.2 hû a kâng ral a ni.

Kolasib-ah chuan Venglaia Parish Hall-ah bawrhsap Dr H Lalthlangliana'n a hawng. DC chuan, "Kangmei vên hna hi Forest department leh Fire department thawh tur bik a ni lo a, mi tinte hi mahni phak tâwk ṭheuhah kan fimkhur a ngai a, chu chu kângmei chhuak tur vênna sâwt ber a ni," a ti.

Forest Survey of India-in satellite hmanga 2020 chhunga ram kâng a chhinchhiah danin, Kolasib district-ah ṭum 213 a kâng a, ram hectare 217.11-a zau a kâng a ni.

Serchhip DC Kumar Abhishek pawhin DC conference hall-ah Fire Prevention Week a hawng. Inkhawma tarlan danin, kum 2020 chhung khan Serchhip district-ah hmun 119-ah kângmei a chhuak a, chu'ng zinga 95 chu lo hâl vanga chhuak niin, hmun 25-ah mimal ram kâng a awm. November 2020 aṭanga nimin thleng khan hmun 19-ah kângmei a chhuak tawh a, ram hectare 52.6-a zau a tichhia a ni.

Lawngtlaiah chuan DC conference hall-ah LADC chief executive member (CEM) Manghmung Chinzah-in Fire Prevention Week a hawng. CEM chuan, kângmei chhuak tam zawk chu fimkhur loh vang a nih thu sawiin, "Kângmei vèn kawnga hmalakna hi mi tih atan dah loin, mahni ngeiin a taka kan thawha kan nunpui a pawimawh," a ti.

Hapta hawnnaah hian sorkar department hrang hrang leh LADC-a officer te, VC leh tlawmngai pawl aiawhte an tel. Lawngtlai district hian kum 2010 leh 2015-ah district level fire prevention award pakhatna a dawng a, kum 2019-ah pahnihna leh kum 2014-ah pathumna a nih thu tarlan a ni.

Mamitah chuan LAD conference hall-ah bawrhsap Dr Lalrozama'n Fire Prevention Week a hawng a; thu sawiin, "Ram kan tih kan nasat hian kan economy-ah nghawng a nei a, tun maiah harsatna thlen lo mah se, kan tu leh fate tan a la pawi dawn a ni," a ti.

Forest Survey of India-in satellite thlalak hmanga a chhinchhiah danin, kum 2020 chhung khan Mamit district-ah hmun 211-ah kângmei chhuakin, ram hectare 497.90-a zau a kâng a; chu'ng zinga hmun 205 (hectare 493.40) chu lo/huan/leipui/ bawlhhlawh hâl niin, hmun paruk dang (hectare 4.50) chu ram kâng a ni.