COVID-19: Mizoram dinhmun Hripui vei mi 1 hmuh belh a ni
February 7, Pathianni khan Mizoramah Covid-19 vei mi pakhat hmuh chhuah a ni a, nimin khan mi pathum chhuahtir an ni. Mizoramah hripui vei mi 4,384 hmuh chhuah a ni tawh a, chu'ng zinga mi 4,353 chu dam taka chhuahtir tawh niin, 99.32% an tling.
Hripui vei February 7-a hmuh awmchhun chu Rapid Antigen Test hmanga hmuh chhuah, Venghluia mipa kum 22 mi a ni. Pathianni khan biak-inah a inkhawm a, inkhawm bânah a ke-ah harsatna a neih avangin damdawi-inah kalpui niin, Covid-19 a vei tih hmuh chhuah a ni. Hri a kàina hriat a ni lo a, Covid-19 symptom a nei lo.
Nimin khan Covid-19 laka fihlîm tawh mi pathum chhuahtir an ni a; SRH-ZMC aṭanga chhuak mi pahnih leh Hnahthial CCC aṭanga chhuak mi pakhat an ni.
Mizoramah Covid-19 vei mi 4,383 hmuh chhuah a ni tawh a, mipa 3,206 leh hmeichhia 1,177 an ni. Nimin tlai dar 5 thleng khan mi 4,353 (99.32%) chhuahtir an ni tawh a, mi pakua (0.20%) thi tawhin, enkawl mek mi 21 (0.48%) an awm.
Pathianni khan TrueNAT-PCR hmangin Siaha leh Kolasib district-ah swab sample 25 leh RAT hmangin Aizawl, Siaha, Kolasib leh Mamit district-ah sample 530 endik a ni a; sample endik zawng zawng chu 555 niin, chu'ng aṭanga Covid-19 positive hmuh chhuah pakhat chu 0.18% a ni. ZMC laboratory-ah sample endik a ni lo.
February 7, 2021 thlenga Mizorama swab sample endik tawh zat chu 2,15,331 a ni a, chu'ng aṭanga Covid-19 positive mi 4,383 chu 2.04% a ni. Hripui vei hmuh tawh zinga mi 2,075 chu Mizoram chhunga kái an ni a, mi 2,308 chu Mizoram páwn aṭanga an rawn luh hnua hmuh chhuah an ni thung.
Mizorama district 11 zinga district pasarih - Siaha, Champhai, Serchhip, Mamit, Saitual, Khawzawl leh Hnahthial district-ahte Covid-19 vei an awm tawh rih lo. Kolasib district-ah pawh pakhat chiah a awm tawh a, Lawngtlai district-ah mi pahnih leh Lunglei district-ah mi pathum chiah an awm tawh bawk.