MNF candidate tur Vanlalzawma

MNF president Zoramthanga chuan nimin khan Serchhip biala Assembly by-elec­tion neih turah MNF party candidate atan Vanlal­­zawma, MNF vice president ruat a nih thu a puang. Hetih lai hian, Election Commission of India chuan by-election neih hun tur a la puang lo.

MNF President chuan, Serchhip biala MLA by-election atana Nomination Committee an dinin ngun taka an ngaihtuah hnuah, candidate atan Vanlalzawma lungrual taka an pawm thu a sawi. Vanlalzawma hi Lok Sabha MP leh MLA lo ni tawh a ni.

Tarlan tawh angin, MNF MLA 12-te'n an hêk avangin Assembly speaker Lalrinliana Sailo chuan October 27, 2020 khan Lalduhoma chu MLA aṭangin a bàn a; chumi hnuah Serchhip constituency chu bial ruakah Assembly-in a puang nghal.

Serchhip biala by-election neih turah ZPM chuan an party aṭangin Lalduhoma bawk a din leh tur thu an sawi chiang tawh a; Congress party chuan la puang lo mah se, an tifel thawkhat tawh nia thu dawn a ni.