Mimalin tu mah i bei ve lo ang u - Lalduhoma

ZPM chuan nimin khan an pisaah an party zawm thar lawm luhna inkhawm an buatsaih a; thu sawitu Lalduhoma, ZPM leader chuan, mimala tu mah bei ve lo turin an party mite a chah.

Lalduhoma chuan, ZPM chu party dangte el ber a nih thu sawiin, "Party dangte hian min bei na em mai a, kan din­hmun a chhe lo a ni ang. Mimal sawichhiat vak vakte hi tih ve loh tur a ni. Serchhip biala by-election atana MNF Nomination Committee an ṭhu tawh a, candidate an tifel tawh em chu ka hre lo. Keimah sawichhiatna bu siam turin thutlukna an siam tih erawh ka hria. Hetiang hi tih ve loh tur," a ti.

ZPM Leader chuan, an party-ah MNF leh Congress culture seng luh phal a ni lo tih sawiin, "Lim hâl leh bomb tihpuahte hi kan culture a ni ve lo. Zu pawh hi kan culture a ni ve lo a, kan fihlim vek chu ka ti lo, kan fihlim chho zelin ka ring," a ti a; inthlan chu thianghlim taka ṭawngṭaina nena hmachhawn tur a nih thu a sawi. 

AMC inthlan awm tur chu zaikhawm nena tehkhinin Lalduhoma chuan, "Hla thlan thiam a pawimawh a, sak thiam tlàn thlan a ngai. Keini chu kan policy-ah kan chiang tláng a, kan zái tui. Party dang chu an policy-ah an chian loh avangin hla thiam tlân an nei lo. MNF hian nuai thum hla an thlang ṭha ngam tawh loin ka hria," a ti. 

Lalduhoma chuan, AMC chu direct funding dik tak a nih thu sawiin, "Finance Commission-in state sorkar leh AMC-in kum nga chhunga an chan tur an siam lâwk vek. Finance Commission hnuhnung berin report an thehlut tawh a, state leh AMC chan tur zat chiah ka la hre lo," a ti a; state sorkarin AMC sum a hrên chuan a pung nen a pek zel a ngaih thu a sawi.

AMC-ah state-a sorkar lai party kher thlan tlin an ṭulna a awm lo tih sawiin ZPM Leader chuan, "State sorkar hlau taka kal tur ai chuan, an thuneihna chin huaisen taka hmang ngam AMC sorkar neih a ṭha zawk," a ti.

An party zawm tharte lâwm luttu ZPM vice president K Sapdanga chuan, AMC-ah naktukah vote thlak tur ni se, a chungnung ber tura ngaih chu ZPM an nih thu sawiin, "Kan khingpuite min ngaihdan pawh a ni. Theihpatawpin, dan pawh pawisa loin min bei mek. Ni sarih lek hun a awm tawh a, hma kan hruaina goal kan sûttir tawh tur a ni lo," a ti a; defence line-a awmte'n theihtawp an chhuah a ṭul thu a sawi.

ZPM thuchhuah tarlan danin, inkhawmah hian mi eng emaw zat ZPM-ah lawm luh an ni a, chung zingah chuan C Dothanga, IPS (Rtd.) leh Apex Bank assistant general manager (Rtd.) C Vanngurliana te an tel a ni.