Vanglaini logo

MNF-in Lalduhoma bàn a nih dan an sawifiah

MNF Legal Board chuan nimin khan Aizawl Press Club-ah thuthar thehdarhtute kâwmin, MLA aṭanga Lalduhoma bàn chungchang an sawi. Lalduhoma'n, ZPM party-in 2018 General Election-ah political party ni turin hmalakna an nei tawh anga a sawi chu thu dik lo niin an sawi a ni.

MNF Legal Board chairman C Lalramzauva chuan, "Zoram Peoples Movement (ZPM) Ṭang­rual Pawl tiin August 15, 2017-ah MPC, ZNP leh ZEM aiawhten thawhhona thuthlung ziakin an din a, hetiang hian 2018 inthlan­puiah symbol, manifesto, flag leh inkaihhruaina thuhmun hnuaiah ṭang­rual pawl angin inde­pendent candidate 38 an nei a, mi pasarih thlan tlin an ni," a ti.

Kum 2018 inthlanpui laiin ZPM chu party anga din tura hmalakna a la awm lo nia sawiin Lal­ramzauva chuan, "January 10, 2019-ah an president Dr Kenneth Chawngliana'n political party a register turin dilnaah hming a ziak chauh. Pu Lalduhoma'n insawi thiam nana 2018 general election-ah ECI aṭangin ZPM party registration tihfel hman a nih loh avanga independent-a nomina­tion file a nih thu a sawi hi mipui bum tumna a ni," a ti a, independent-a ding sia ZPM party MLA anga a awm chu dan bawhchhiatna a nih thu a sawi. 

C Lalramzauva chuan, independent-a ding chunga MLA-a thlan tlinin political party pakhat tana a inhman chuan dan a bawhchhia nia sawiin, "Independent MLA paruk, ZPM party MLA anga inchhál ṭhinte hian independent MLA angin press conference an nei ve a, mahse, an rilru leh chêt vel dan zawng zawngah ZPM mi leh sa ni hliah hliah anga an lo khawsa leh si a nih chuan ni miah si lo, ni âwm taka lan an tumna mai a ni ang. ZPM Political Affairs Committee (PAC)-ah member an nihna lang lo mah se, a takah chuan PAC meeting-ah an tel ve fo ṭhin tih hriat a ni a, hei hian independent an nihna an phatsana ZPM party mi an ni tawh tih a tilang chiang hle," a ti. 

ZPM party hruaitute'n MLA parukte chu an party thil tihnaah an hnûk tel zel ṭhin a nih chuan 'MLA aṭangin anni ho pawh hi i bàntir leh law law ang aw,' an ti ru reng em ni, tih chu zawhna awm thei a nih thu a sawi bawk.