CM leh CYMA-in kawngpui an sawiho Hna thawk ṭha lote black list an remti

Chief minister Zoram­thanga leh Central YMA office bearer-te chu nimin khan CMO cabinet room-ah inkâwmin, Mizoram kawngpui siam chungchang an sawiho. Kawng siamtu zingah thawk ṭha lo leh thawk thei lote chu insawifiah tura hriattir a, lungawina a awm loh chuan hna thawk thei lo tura puan (black list) an remti.

Kum 2017-a Champhai Zotlanga YMA General Conference vawi 71-nain, 'Mizoram hmun hrang hranga inkalpawhna kan neihte hi tun aia ṭha leh changtlung zawka siam a nih theih nan CYMA-in hma la rawh se' tih a rêl bawhzuiin CYMA office bearer-te chuan nimin khan Chief Minister an kâwm a; CM hi PWD hotute'n an ṭawiawm.

Central YMA tarlan danin, inkawmnaah hian, kawngpui ṭha neihna turah theihtawpa ṭan lâkho a, hna thawk tura thlante'n hna an thawh ngei theih nan hmalak an remti a; hna thawktu zinga thawk ṭha lo leh thawk thei lote chu insawifiah tura hriattir a, lungawina a awm loh chuan, hna thawk thei lo tura siam an remti a ni. 

CM chuan, CYMA leh PWD thawhhona thu­thlung anga CYMA-in Mizorama kawng siam an endik chu lawmawm a tih thu sawiin, kawng ṭha neih a nih theih nan YMA chauh ni lo, khawtlang leh mipuiin an theihna zâwn ṭheuha hma an la chu lawmawm a tih thu a sawi. Kawngpui ṭha neih a nih theih nan, kawng siam mekte uluk zawka vilpui turin YMA-te a ngen nghal.

Inkawmnaah hian, Pradhan Mantri Gram Sadak Yojana (PMGSY) hnuaia kawng siama harsatna awm anga lang chu a tlangpui thuin contractor aṭanga hna inpek chhâwn tam lutuk vang a nih thu sawi a ni.

CYMA hruaitute chuan nimin vêk khan an pisaah Mizoram Road Builders Association hruaitute an kâwm a; Mizoramah inkalpawhna kawngpui ṭha neih a nih theih nan contractor hming hawha hnathawhin hna a tihchhiat theih avangin contractor hming hawh titawp tura ṭan lâkho an remti a ni.