KHAWTHLIR

Animal Husbandry & Veterinary (AH&Vety) department chuan, ui zawrh, hralh leh inthlah puntir chungchangah hriattirna a tichhuak a; ran hralh leh ui inthlahpuntir ang chi kalpui mekte chu February 5, 2021 aṭanga ni 60 ral hmain Mizoram State Animal Welfare Board-ah registration ti vek turin a hriattir. Registration certificate tel lo chuan sumdawnna atan ui zawrh leh hralh emaw, inthlah puntir emaw, ran dawr (pet shop) emaw, a mal emaw a hlawmin emaw ran zawrh leh hralh phal a ni lo.

Lairam Isua Krista Baptist Kohhran Ṭhalai Pawl, Lawngtlai Bazar Veng Pastor Bialte chuan February 6, Inrinni khan Lawngtlai District Hospital tan unit 26 an pe a, a petute mipa 17 leh hmeichhia pakua an ni.

AMC Ward III-a ZPM candidate C Lalchhandami, Ramhlun North lehkhabu ziah, 'Awm dan mawi leh hmangchang' (Manners & Etiquette) tih chu February 6, 2021 khan Ramhlun Sports Complex field-ah ZPM leader Lalduhoma'n a tlangzarh. Lalduhoma chuan, AMC inthlan tura an party candidate-in lehkhabu ṭha tak a ziak thei chu chhuanawm a tih thu a sawi. 

Khawzawl DC Zothanmawia chuan nimin khan thuchhuah siamin, Khawzawl district mipuite chu Covid-19 vaccine chungchanga thuthang dik lote hnâwl tur leh, doctor leh sorkar thuchhuah ngai pawimawh turin a sáwm. Covid-19 hri léng a la reh loh avangin mipui himna tura sorkarin inkaihhruaina a duante ṭha taka zâwm zel turin mipui a chah bawk. Khawzawl district-ah hian healthcare worker mi 140-in Covid vaccine an la tawh a ni.

State Referral Hospital-ah nimin khan Covid-19 vei mi pakhat dah luh a nih laiin, mi pahnih chhuahtir an ni a, mi panga enkawl mek an ni. SRH-ZMC Bulletin tarlan danin, mi panga zinga pahnih chu ICU-ah enkawl zui zelin, ventilator hmantir ve ve an ni a, Isolation ward-a awm mi pathum zingah harsatna lian tham nei an awm lo.