AMC subject pek belh kan tum - Tawnluia

9th February, 2021

UDPA dept. changtu Tawnluia, MNF sr. vice president chuan nimin khan Bawngkawnah MNF information centre a hawng a; thu sawiin, AMC thuneihna chanvo (subject) pek belh an tum thu a sawi.

Tawnluia chuan, state sorkar leh AMC sorkar chu pafa ang an nih thu sawiin, "State sorkar lai hian AMC hi chhawmdawl leh kaih ngai an la ni a, a tahtawlin an subject (thuneihna chanvo) hi an zawh tâwka pêk belh zel a ni dawn. Chuvangin, tun atan chuan state leh AMC thawk dun theia kan siam a ngai a ni. Kan tilian zel ang a, mipui tana chhawr tak tak tlakin siam chhoh zel kan tum," a ti.

Inkhawmah hian MNF adviser Lalchhandama Ralte leh AMC Ward II-a MNF candidate Lalringliana te pawhin thu an sawi a ni.

MNF adviser Dr R Lalthangliana chuan, nimin khan Kulikawn YMA Hall-a campaign inkhawmah thu sawiin, MNF sorkar laiin kum 2007-ah Aizawl Municipalities Act pawm a nih thu leh AMC enkawltu UDPA department din a nih thu a sawi a, "Kum 10 kal taa AMC sorkar ang ni lo, MNF AMC sorkar tharah thil ropui, hmasawnna ropui tak a thleng ang tih ka puang a ni," a ti.

Dr R Lalthangliana chuan, "Aizawl khawpuiah hian SEDP-ah eizawnna hrang hrang dapte tan lo neih tur ram a awm ve lo a, a rem lo. Kut hnathawktu hrang hrang eizawngtute tan pawh Covid boruak a zo ang a, kalpui theih thuai kan inbeisei," a ti a; Covid-19 boruak a zawh hunah chak zawkin SEDP kalpui a nih tur thu a sawi.

Inkhawmah hian MLA Prof. F Lalnunmawia leh AMC Ward XIX-a MNF candidate Dr Irene Lalruatkimi te pawhin thu an sawi a ni.

MNF ṭhalaite pawhin nimin khan Ramthar Vengah 'Sikpui fehchhuah' an buatsaih leh a; MNYF president Lalrinawma, MLA chuan, AMC inthlan tura party tin candidate-te chu an ṭha vek tih a sawi rualin, "State sorkar chu tu nge au eih ngam ang a, tute nge ngampa taka kan Chief Minister kawngka va kik ngam ang tih ngaihtuah a ṭul," a ti a, Mizoram sorkarin chak taka thlawhhmá a lâkpui theih tur councillor neih a pawimawh niin a sawi.

Inkhawmah hian MLA Ramthanmawia leh Ward IV-a MNF candidate Laltlanzova Khiangte te pawhin thu an sawi a ni.