ZNP intite hi MNF kuang ben ruala lám ṭhinte an ni - ZPM Ṭhalai

ZPM Ṭhalai chuan thuchhuah siamin, ZNP intite chu mi kheuhbeuh tlemtê, MNF khuang ben ruala lám ṭhinte an nih thu an tarlang.

ZPM ṭhalaite chuan, ZPM aṭanga ZNP din thar lehtu intite chu tlemtê an ni a, MNF sorkar an bei ngam lo a, ZPM an bei ngar ngar thu an sawi a; inthlan dawnah ZPM beng hniam tuma thapui thawhin, press release an siam ve ṭhin a, an thuchhuahte chu chhàn tlakah ngai loin en liam ṭhin mah se, an nihna tihchian sawifiah a ṭula an hriat thu an tarlang a ni. 

"ZNP intite hi mi kheuhbeuh tlemtê, ZPM-a  thawhhona tichhe zawnga khawsa ṭhin, ZPM tichaktu aia uai fualtute an ni a, party-a nihna sapui hauh a, mi thar ṭha tak takte lo luhna tur dâltute an ni ṭhin," an ti a; nikuma local council inthlan dawnah ZPM a phel anga lantir tuma ṭan an khawh nasat thu an sawi.

ZPM Ṭhalai chuan, ZNP office bearer-te leh MNF president Zoramthanga thla lakho tun hnaiah a darh tih sawiin, "ZPM aṭanga an chhuak ta kha ZPM tan hnára hlît phâwi ang huai a ni. Khuang ben ruala záwngte a lám ṭhin ang maia MNF-in an duh duh an tihtir theihah mipuiin an ngai tawh a ni," an ti.