Zophaia in sak tawptir turin Core Committee-in Home dept hriattir
August 8, Ningani khan ramri chungchang ngaihtuahtu Core Committee chu an ṭhukhawm. Committee chairman Lalnunmawia Chuaungo, chief secretary chuan, Bairabi Zophai hmuna Assam lamin hma laa in an sa chu ṭha a tih loh thu sawiin, hna an thawh chhunzawm lohna atana a ṭul anga hma la turin Home department hotute a hriattir.
Thuthar thehdarhtute zawhna chhangin Core Committee-a tel MZP hruaitute chuan, meeting-ah hian Chief Secretary chuan Assam leh Mizoram lamin an khawih loh ve ve tura dah (status quo) atana puanah Assam lamin hma an la chu ṭha a tih loh thu a sawi chhuak tih an sawi a, "Mizoram aṭangin police an awm leh awm lohte a zawt a, IR an awm thu kan sawi a ni. Chief Secretary chuan, police-te chu thil kalphung hrilh ṭhat leh an ṭul thu a sawi chhuak a ni," a ti.
MZP hruaitute sawi danin, Chief Secretary chuan, Zophaia Mosolman biak-in sak mek chu sak chhunzawm a nih lohna atana hma la tur leh a bula bungraw dahkhawmna tur in sak chu ṭhiah a nih theihna atana hma la turin Home department hotute a hriattir a ni.
Meeting chuan, Zophaia thil thleng chungchangah, Kolasib DC leh Cachar DC inbe turin thutlukna an siam. Status quo chhunga Assam hmalakna chawlhsan a, an hmalak tawhnate ṭhiat tura ngenna thlen turin Kolasib DC ruat a ni. Assam lam hian hma an la lo a nih chuan Chief Secretary-in a ṭul anga hmalak a nih tur thu a sawi.
Meeting-ah hian, Zophai vela leilet chu hnam dangin an enkawlin neih zel an tum thu sawi lan a ni a, Mizote ngeiin leilet enkawl se a ṭhat tur thu sawi a ni. Mizote'n leilet enkawl se, venhimna pek theih an ni dawn leh dawn loh zawhna chu, official-te chuan venhimna an pek theih tur thuin an chháng.
Core Committee thutlukna anga MZP-te'n ramri chungchanga document awmte an lak khawm an thehluh chu zir chian a la ni lo a; MZP lam chuan lungawi thlak loh an tih thu meeting-ah hian an sawi chhuak. Chief Secretary chuan, document-te chu zir chian a nih tur thu a sawi.
MZP hruaitute chuan, ramri chingfel turin official-te chu an inhuam thui hlea an hriat thu sawiin, "Ministry lam aṭangin thu dang a awm a nih loh chuan official lam chu kan meeting-a an thusawi aṭang hian an inhuam thui hlein kan ngai," an ti.
Zawhna chhangin MZP president L Ramdinliana Renthlei chuan, Core Committee an ṭhutkhawm har avanga total bandh huaihawt an tum chu an ṭhulh rih thu a sawi a, "Naktuk hian meeting neih kan tum a, Committee meeting an koh leh tâk si avangin total bandh huaihawt kan tum chu kan ṭhulh lailâwk rih," a ti a, sorkar hmalakna an thlir zui zel tur thu a sawi.
MZP President chuan, Bairabi Zophaia Zofate Chawlhbuk sak an tum chu an la ṭhulh lo tih sawiin, "Assam lamin Zophaiah hian hma lak chhunzawm lo mah se, kan ram chhung a ni a, chawlhbûk kan sak theih lohna chhan tur kan hre lo," a ti.