Joint NGO-in DNEP ṭha an ti lo Duh lohna lantir ngei ṭul an ti

NGO Coordination Committee (Joint NGO) chuan nimin khan Central YMA Hall-ah Draft National Education Policy 2019 (DNEP) chungchang zirhona an buatsaih. Sorkar laipuiin a duan mek Draft National Education Policy 2019 (DNEP) chu Mizote tan tha tawk loah an ngai a, dodalna  lantir ngei ni se an ti. Uluk lehzuala DNEP 2019 zirhona buatsaih an rel.

DNEP 2019 zirhonaah hian kohhran lam leh NGO hrang hrang aiawh te, zirtirtu pawl hrang hrang aiawh te, zirna lama mithiam bikte an tel. Zirhonaa telte chuan action plan an duang nghal a; DNEP 2019 chu ṭha an tih loh thu sorkar laipuiah thlen ni se an ti a, duh lohna lantir nan Joint NGO huaihawtin Protest Day hman ṭha an ti tlang bawk.

Joint NGO hian Draft National Education Policy hi Hindu culture nena inmil tura zirna kalpuina tur nia an ngaih avangin ṭha an tih loh thu an lo puangzar tawh a ni. Joint NGO secretary Lalhmachhuana chuan, DNEP chu kum 2018-ah member pasarih awmna TSR Subramanian Committee report behchhana duan a ni tih sawiin, "Phek 478-a chhah a ni a, secularism chungchang tarlan a awm miah loh laiin, Sanskrit erawh ṭum 23 lai a lang thung. Zirna hi centralise a, National Education Commission (Rashtriya Shiksha Aayog) Prime Minister kaihhruaina hnuaia Central enkawl tura duan a ni," a ti.

Central YMA General Secretary tarlan danin, DNEP ang chuan, tuna India rama zirna kalphung, 10+2+3 system chu tidanglamin, 5+3+3+4+4  ni tura duan a ni a; kum 5 chhung foundation stage (pre-primary - kum 3 leh grade 1&2), kum 3 chhung primary stage (grade 3,4 &5), kum thum dang middle stage (grade 6, 7 & 8), kum 4 chhung secondary leh higher secondary (grade 9, 10, 11 & 12) leh, kum 4 chhung college zirna a ni ang. RTE Act huam chin kum 6-14 ni ṭhin chu kum 3-18 chin huamtir tura duan a ni.

DNEP phênah thil in­phûm rû a awm theih thu leh chu'ngte chu hnam tlém zâwkte tan a him lo thei dawn tih sawiin Lalhmachhuana chuan, "Zirna hmang tho sia naupangte zirna aia India ngaih pawimawh hmasak a awm thei dawnin a lang. Zirlaite Hindi leh Sanskrit zirtir tumnate pawh a tel a nih chuan, Mizote tan a har hle dawn a ni," a ti a; zirna inte complex khata khaikhawm ang hi tlang ramah chuan a theih loh tluka ngaih a nih thu a sawi.

Lalhmachhuana chuan, Mizo zia leh nunphung leh vai culture chu a inang lo hle a, Mizoramah chuan Mizo culture mila zirna kalpui ṭha an tih thu a sawi a, "DNEP hi Hindi/Sanskrit vawrh lâr tumna emaw, Hindu culture nena inmil tura zirna kalpui ṭha kan ti lo. Zirchianna aṭang hian a nihna dik tak hriat a, a ṭul anga hmalak zel Joint NGO chuan a tum a ni," a ti.

DNEP 2019-ah hian sawiselna leh rawtna nei tan July 31, 2019 thleng hun hawn a ni a, mi ṭhahnemngai, pawl, kohhran leh sorkar angtein rawtna ṭhahnem tak a lut tawh. Mizoramah pawh sorkar, kohhran leh pawl angtein sawiho a ni tawh ṭhin. Joint NGO chuan zau zawka inràwn khawm leh ṭha a tih avangin mithiamte sáwmin sawihona a buatsaih ta a ni.