Kan sorkar leh hunah medical research centre kan nei let leh ang - Lal Thanhawla

Mizoram Pradesh Cong­­ress Committee (MPCC) president Lal Thanhawla chuan, Congress party an sorkar leh hunah Falkawna medical college chu medical research centre a nih leh dawn thu a sawi a; MNF kaihhruai sorkarin an tum ber chu anmahni intihhausakna atana sorkar hman nia a hriat thu a sawi bawk.

Nimin khan Congress Bhavan-ah thu sawiin Lal Thanhawla chuan, Congress kaihhruai sorkarin medical college ṭha tak MIMER a din thu sawiin, "Post graduate zir zawm theihna tura ruahman a ni a, research centre a ni nghal bawk. Pawisa sen khat pawh thawh lo, cheng vbc. 40 kan hnutchhiah pawh tikháwbáw a, ár-in leh kel-ina chhuah mai maitu hian ama hming chawiin Zoram Medical College a ti a. Congress-in sorkarna a siam leh hunah medical research centre hi kan nei leh ang," a ti.

Congress party Pre­sident chuan, mimal tana sorkar hman ṭangkai chu politics-in a tum a nih loh thu a sawi a, "Kan sorkar lai hian a tum ber chu anmahni intihhausakna atana sorkar hman a ni em aw ka ti; hmân aṭang tawhin, eirûk thubuai an neih dan aṭangte hian. Kan awmna apiangah Pathian rawng kan báwl thei a ni," tiin, politics pawh chu Pathian rawng­bawlna a nih thu a sawi. 

Lal Thanhawla chuan, Mizoramah remna leh muanna a awm theihna atan theihtawp an chhuah tih sawiin, "Pathian duh záwng a nih bawk avangin remna leh muanna hlu tak kan nei a, chu remna hnuaiah chuan he ram hian nasa takin hma a sawn a ni. Congress sorkar kal tawh hnathawhte miin an thlir a, sorkar lai mek hnathawh dan an thlir bawk a, mahni thutiama ding ṭhin Congress party hi kaihthawh leh an châk hle niin a lang," a ti.

MPCC President chuan, Bangladesh nena insumdawn tawnna chu MNF-te'n kum 10 an sorkar chhungin an bawhzui loh thu sawiin, "Kum 2008-a kan lo kîr leh khan kan bawhzui leh a, duh angin a kal chak thei lo," a ti a; a ngaihna hre lo sorkarin engtin nge an chhunzawm zel dawn a hriat loh thu a sawi. Congress thuchhuah tar­lan danin, MPCC President hian MZP, MSU, BJP leh PRISM hruaitu hlui mi panga chu an party-ah a lawm lut a ni.