KHAWTHLIR

Zo Reunification Organisation (ZoRO) chuan nimin khan International Day of the World Indigenous Day pualin MCCI Hall, Aizawlah ‘Zo fate insuihkhawm lehna lamtluang’ tih thupui zirhona an buatsaih a, ZORO hruaitute bakah, political party, zirlai pawl leh tlawm­ngai pawl aiawhte an tel. Lalkhawliana paper 'Zo fate insuihkhawm lehna lamtluang' tih leh Prof. Jangkhogam Doungel paper 'ZoRO & UNDRIP with special reference to self-determination' tih zirho a ni. ZoRO president hlui R Thangmawia lehkhabu ziah, 'Zoram' tih chhut thar chu C Chawngkunga'n a tlangzarh bawk.

Ministry of Rural Deve-lopment-a deputy secretary Dr Manik Chandra Pandit leh National Institute of Hydrology-a technical officer leh scientist-E Dr Sanjay Kumar te chuan August 8, Ningani khan Tipa (Tuipang) RD Block huam chhunga Jal Shakti Abhiyan kalpuina atana MGNREGA hnuaia hmalakna hrang hrang - farm pond, contour trench, renovation of traditional water bodies, irrigation leh affo­restation-te an enfiah. Chawhmaah Tipa khua leh a chhehvel an enfiah a, chawhnuah Siatlai, Zyhno, Khopai leh Laki khuate an tlawh a; Tipa BDO James Lalnithanga leh official dangte'n an ṭawiawm.

Zoram People's Movement Tuikum Block chuan thuchhuah siamin, Mizoram sor­karin August 9, 2019-ah an bial chhunga Tlung­vel Village Council an ṭhiat chu pawi an tih thu an tarlang. V/C kal ṭha lai ṭhiah chu tun hnuah Tuikum bial chhungah thleng tawh lo se an duh thu sawiin, "Kan bial khaw hrang hranga V/C ding mek leh V/C ding thar leh zel turte pawhin he thil hi fimkhur phah nana hmang turin kan ngen duh bawk a ni," a ti.

Mizoram Planning, Economic & Statistical Service Association chuan nimin khan Chang­el Resort, Sih­hmuiah General Conference vawi 13-na an hmang a; an hna kaih­hnawih thil pawimawhte an rêl bakah, official statistics changtlung zawk neih theih dan tur an sawiho.