MLA fund kaihhnawih lehkha inthawnah Planning leh Assembly thu a inkalh

Kum 2013-2018 chhunga MLA-te fund hman chung­changah, Planning department-in General Purpose Committee (GPC) ngaihtuah tura Assembly Secretariat-a lehkha a thehluh chungchangah Planning department leh Assembly Secretariat thu a inkalh. Planning lamin Assembly Secretariat-ah lehkha vawi ruk an thehluh thu an tarlan laiin, Assembly Secretariat chuan, an hnenah Planning-in lehkha thehluh an neih loh thu an tarlang.

General Purpose Committee (GPC) ngaihtuah tura Planning & Programme Implementation-in Assembly Secretariat-a lehkha an thehluh dan leh, GPC-te'n an rêl dan zawhna chu Assembly Secretariat-a SPIO chuan chhan­na a pe thei lo vek a, 'A awm lo' tiin chhannaah ziah vek a ni. Planning department SPIO chuan, kum 2013-2018 inkarah Assembly Secretariat-ah lehkha ṭum ruk an thehluh thuin RTI Act hmanga zawhna a chháng thung.

Sorkar liam ta, Mizoram Legislative Assembly pasarihna, kum 2013-2018 inkarah MLA ṭhenkhatin an fund an hman dan turah Planning & Programme Implementation department-in Assembly Secretariat-ah Assembly GPC chinfel turin lehkha thehluh a neia sawi a ni.

Planning lehkha lut nia sawi, GPC-in a chinfel zat te, GPC-in an chinfel dan leh chinfel tura tih MLA-te hming te, chumi atana GPC-in dan a tlawhchhante RTI Act hmangin Assembly Secretariat-ah June 4, 2019 khan information dil a ni a; GPC-in a pawmsak tura lehkha an dawn copy dil tel a ni bawk. Dilna thehluh aṭanga ni 30 liam hnu, July 12, 2019-ah Assembly Secretariat chuan diltu hnenah chhanna a pe.

Assembly Secretariat SPIO-in RTI Act hmanga zawhna a chhannaah chuan, MLA fund hman dan tur GPC-in a chinfel tur chungchangah Assembly Secretariat-in Planning & Programme Implementation department aṭangin lehkha dawn a neih loh thu tarlan a ni. A kaihhnawih zawhna dangte pawh Assembly Secretariat-in Planning aṭanga lehkha an dawn loh avangin a copy pek tur a awm loh thuin a chháng vek a; zawhna zinga pahnih erawh chu an khawih a nih loh avanga an hriatpui loh thuin a chháng bawk.

RTI Act hmang thoin kum 2013-2018 chhungin Assembly GPC ngaihtuah turin Planning department-in Assembly Secre­tariat-ah lehkha thehluh a neih leh  neih loh chungchang Planning & Programme Implementation department-ah zawh a ni a, Planning SPIO hnenah July 18, 2019 khan zawhna thehluh a ni.

Zawhna pakhat chu, "Kum 2013-2018 sorkar chhung khan, MLA fund hman dan turah Planning & Programme Implementation Department-in GPC-in a rêl fel turin Assembly Secretariat-ah lehkha eng zat nge in thehluh? Heng in lehkha thehluh sorkar document-te hi xerox copy a vaiin ka duh a, min pe turin ka ngen a che," tih a ni.

Zawhna chu Planning & Prog­ramme Implementation SPIO chuan July 31, 2019 khan a chháng a, "Assembly Secretariat hnenah hian lehkha vawi 6 pek a ni e. Lehkha copy-te rawn thil tel a ni bawk e," tiin a chhang. Planning SPIO hian Assembly Secretariat-a lehkha an thehluh zawng zawngte copy pawh RTI Act hmanga zawhna chhannaah a thil tel.

Planning & Programme Implementation SPIO-in zawhna a chhannaa a lan danin, Planning department chuan General Purpose Committee (GPC) ngaihtuah atan tiin January 27, 2016, July 5, 2016,  May 15, 2017, May 18, 2017, February 6, 2018 leh May 28, 2018-ahte Assembly Secretary hnenah lehkha an thehlut a ni.

Planning department-in Assembly Secretary hnena lehkha a thawn/thehluh photo copy zawng zawng RTI Act hmanga diltu hnena a pek bakah hian, Assembly Secretary-in a chhan lêtna lehkha ṭhenkhat photo copy-te pawh thil tel a ni bawk.