Mizo hnam hmelmaah Governor puh

PRISM party chuan, Governor chu Mizoram Legislative Assembly-in bill an pass tawh, 'The Mizoram Maintenance of Household Register Bill, 2019' a pawmpui duh loh avangin Mizo hnam hmelma a ni hiala an hriat thu an tarlang.

PRISM chuan, Mizo hnam himna tura Mizoram sorkarin The Mizoram Maintenance of Household Register Bill, 2019 a pass chu lawmawm an tih thu an sawi a, "Governor-in a pawm duh lo a, hetianga kan hnam himna tura hmalakna a pawm duh loh avang hian kan Governor hi kan hnam hmelma ni hialin kan hria. Bill hi pawm thuai turin kan duh a ni. Governor-in bill a pawm duh loh hian, Assembly-in a pass nawn chuan a pawm lo thei lo a, chuvang chuan special assembly session koa Bill hi pass nawn turin vawiinah sorkar kan ngen nawn a ni," an ti.

PRISM party chuan Mizo ram, hnam leh sakhaw him nan kohhrante pawhin ṭan an lak a ngaia an hriat avangin, Mizoram Kohhran Hruaitute Committee chu hma la turin an ngen a; MKHC general secretary Rev. R Lalrinsanga hnenah MKHC anga hma la tura ngenna lehkha, August 8, Ningani khan an pe a ni.