Zirtirtu awm loh avangin N. Khawlêk P/S khâr rih

North Khawlêk Pri­mary School chu zirtirtu awm rih loh vangin first terminal examina­tion zawh, sikul chawlh hnua August 5, 2019-a sikul hawn ṭan a nih leh aṭanga tun thlengin khâr a ni a, zirlai 67-te sikul kal thei loin an awm mek.

Aizawl district chhung, Phullen RD Block chhunga North Khawlêk Branch YMA hruaitute hnen aṭanga thu dawn danin, an khaw Pri­mary School-ah hian zirtirtu a nghet (regular)-a thawk pakhat chiah a awm a, chu chu headteacher a ni nghal. Head­teacher chu a sumin zirtirtu pakhat a ruai a, khawtlang ṭang­rualin zirtirtu dang pakhat an ruai ve bawk a; zirtirtu pathum an awm a ni.

Sikul first term exam zawh, second term ṭan leh dawnah N. Khawlek P/S Head­­master chu training tura koh a nih avangin, district head­quarters-ah training-in a kal a ni. Zirtirtu dang pahnih - head­teacher leh khawtlangin an 

ṭha­hnemngaihnaa an rawihte chu sikula thawk pangngai ni lo, sikula thuneihna nei lo an nih avangin sikul an hawng ngam tawh rih lo a; second term sikul luh hun ṭan tirh, August 5 aṭanga tun thlengin sikul chu an la hawng leh ta rih lo.

North Khawlêk Branch YMA hruaitu pakhat chuan, "Zirtirtu a ngheta thawk awmchhun training-in a kal daih si a, mi dang pahnihte chu phuahchawp taka rawih mai an nih avangin, loh theih lohna avangin sikul hi khâr a ngai rih ta a ni," a ti.