August 2019 chhunga sum pe turin V/C-te'n Mizoram sorkar an phût

All Mizoram Village Council Association (AMVCA) chuan, sorkar laipuiin village council-te'n tualchhung hmasawnna atana hna an thawhna tur sum cheng nuai 4,544 a pek chu V/C-te kuta pe chhuak thuai a, August 2019 chhung ngeia V/C-te pe turin Mizoram sorkar an phût.

AMVCA chuan thuchhuah siamin, sorkar laipuia Finance Ministry-in Mizorama V/C-te tualchhung hmasawnna tura sum a pek ṭhin angin, November 2017 khan Mizoram sorkarah cheng nuai 4,544 a rawh pe tih an tarlang a, "VC-te'n hnathawhna tur sum kan hmuh vat theih nan state sorkara pawisa pek aṭanga ni 15 chhunga pe chhuak tur leh pek chhuah tlai chuan RBI rate angin interest chawi turin a hriattir a ni," an ti a; Congress sorkar chhungin pek an nih loh thu leh MNF sorkar hnuah pawh tun thlengin an la dawn loh thu an sawi.

AMVCA tarlan danin, MNF sorkar hnu, February 26, 2019-ah AMVCA inkhawmpui, PUC Auditorium, Aizawla neihah khuallian K Lalrinliana, LAD minister-in, 'Excluded area fund (V/C-te hnathawhna tur fund) in hmuh tur hi tun aṭanga kar hnih hnuah khaw tinin in dawng vek ang,' tiin a puang a, Mizoram hmun hrang hrang aṭanga V/C palai kal khawm 3,000 vel chu an lawm hle a, kut an béng nasa hle a ni.

Sum chu LAD Minister-in July 3, 2019 khan district hrang hranga LAD officer-te hnenah a sem tih sawiin AMVCA chuan, "A tak ram erawh vawiin thlengin V/C-te'n kan la hmu lo. LAD Minister-in min tiam aṭangin thla nga chuang (August) kan kai chho a, tun thlengin Mizorama V/C zingah he fund hi dawng kan la awm hauh lo," an ti.

AMVCA chuan, V/C-te sum hmuh tur chu August 2019 chhung ngeia V/C-te hnena pe turin sorkar an phût tih an tarlang a, "Mizoram V/C-te pawisa tur liau liau cheng nuai 4544 hi min min pek vat loh chuan AMVCA kaihhruainain nawrhna kan kalpui nghal ang," an ti a; Prime Minister hnenah Mizoram sorkar hêkna memorundum an thehluh tur thu an puang a ni.