Cropping zone buaipui ṭan a ni tawh SEDP-ah mau/rua supply a la awm lo

Mizoram sorkar kaihruai mektu MNF party-in flagship programme an neih, Socio Economic Development Policy (SEDP) hnuaiah agriculture leh a kaihhnawiha hmalakna tura an tarlan 'cropping zone' atana hmalakna a awm tawh a; Hmunpui ramah Model Bamboo Plantation siam tum a ni. Chutih laiin, Mizoram páwn aṭangin mau/rua supply a la awm lo thung.

RTI Act hmanga cropping zone chungchanga Horticulture department-in hmalakna a awm leh awm loh zawhna, Horticulture-in December, 2019-a chhanna an pekah chuan, "Awm tawh e," tih a ni a; SEDP hnuaia Horticulture department-in hma a lâk tawh chinte an tarlang.

SEDP B-2.1 (iv)-ah chuan, 'Huan nghet neitute dâwm kân nan leilung awm dan azirin thlai chìn hlâwkna mual (cropping zone) hrang hrangah ṭhen a ni ang a, huan neitute chawi kânna turin a chìn aṭanga a hralh/dehral thlengin awmze nei zawka chhawmdawl an ni ang. Eizawnna inang (trade) leh zau khat (compact area)-a awmte'n a huhoa hma an lak theih nan society/farmer association-te hmanga hmalak tum a ni ang a. Sorkar department-te'n enpui hna (monitoring) uluk zawka thawkin kawng hrang hrangin an chhawmdawl ang,' tih a chuang.

Cropping zone kaihhnawihah hian Horticulture department chuan hmalakna chi hnih a awm tawh thu an tarlang a; chungte chu - Horticulture thlai huan siamtute hnena pek tur tui pipe ruahman mek a nih thu leh, Mamit district-a Hmunpui ramah Model Bamboo Plantation siam tura hmalak mek a nih thute a ni.

Cropping zone chungchang hi tuna Cabinet minister Dr R Lalthangliana chuan kum 2017 khan thuthar thehdarhtute a kawmnaah a lo sawi tawh a; zawhna a chhannaah, "Kan sorkar hmasak lai pawhin kan survey ve reng. Organic hman chungchang pawh kan review a ngai dawnin ka ring. Kan production, thawh chhuah rang tur chi, kan thlai thar chhuah lam, kan taksa tana ṭhalo tur lam chu kan ngaihtuah tel a ngai dawn a, group of expert kan nei vek dawn... Kan sorkar hmasaah khan tih thiam tâwk loh kan nei ve tho, fuh lo lai kha kan admit thlap. Tunah erawh chuan hmél thar kan hmuh ka beisei," tiin a sawi.

RTI Act hmanga mau/rua chi supply a awm tawh leh la awm loh leh, supplier leh sem/hralh leh dan tur chungchanga zawhna Horticulture department SPIO-in December 9, 2019-a a chhannaah chuan, "Horticulture department-ah mau/rua chi supply a la awm loh avangin supply-tu emaw, a rate emaw, a sem dan tur emaw, a hralh dan tur emaw sawi theih a la ni lo," tiin a chhang a ni.