Mimal tan MLA fund hman theih a ni lo GPC-in MLA fund hman phalsak loh a nei

Mizoram sorkar term liam ta, 2013-2018 chhung khan MLA ṭhenkhatin an MLA fund hmanna tura an tih, Assembly General Purpose Committee (GPC)-in a phalsak tâk loh an awm. MLA fund hman theih dan chungchanga dilna leh zawhnate GPC-in a chhannaah, MLA fund chu mimal thil atan hman theih a nih loh thu tarlan a ni.

Mizoram, sorkar term kal lai mekah MLA ṭhen­khatin all India service /central service ni tura coaching kalte ṭanpuina atan MLA fund hman an tum thu an sawi tawh a; chutih laiin, MLA fund hmanna tur kaihhruaina bu tharah hman phalsakna hmuh tur a awm lo.

Vanglaini-in RTI Act hmanga MLA fund chungchang Plan­ning & Programme Implementation depart­ment-a a dilnaah, zirlaite coaching class kalna senso leh zirlai harsa ṭanpuina atan hman theih a nih leh nih loh zawh a ni a; Planning depart­ment SPIO chhan­naah, Guidelines on MLALADS copy thar ber, July 15, 2019-a tihchhuah thil tel a ni.

Guidelines on MLALADS thar berah hian a hmaa awm lo thil pahnih/khat chauh telh thar a ni. Guidelines-a zirlai kaihhnawih inziah­na, Annexure-I: 'Illustrative of list of works that can be taken up under MLALADS' tihah thil chi hrang 23 a awm.

Kaihhruainaa zirna lam hawi deuha ngaihte chu - No. 1-ah, 'Construction of educational buildings' tih te, No. 7-ah, 'Public reading rooms or study rooms or village library' tih te, No. 22-ah, 'Assistance to health and education institutions in the form of GIA' tihte a ni. Annexure-II: List of work not permissible under MLALADS tihah thil panga a lang a; No. 1-ah private school tan hman phal a nih loh thu a chuang bawk.

MLA fund hmanna tur thil ṭhenkhatah dan angin hman theih a nih leh nih loh sorkar official-te'n Planning & Programme Implementation depart­ment hnenah an zawt a; chu'ngah chuan Planning lamin GPC sawifiah turin Assembly Secretariat-ah a thawn chhâwng leh hlawm.

Assembly GPC-in zawhnate a sawifiahnaa a lan danin, MLALADS kaihhruaina ang chuan, MLA fund hmangin damdawi lei leh clinic hawn chu a remchan loh thu te, MLA fund chu mimal atan hman theih a nih loh thute a lang.

Kum 2013-2018 chhunga Mizoram As­sem­bly term-ah MLA ṭhenkhatin MLA fund an hmanna chu Assembly GPC-in a ngaihtuah hnuah hman chhunzawm lo tura tih a nei a; GPC hian thil paruk a ngaihtuah a ni.

December 12, 2015 khan Siaha SDO(C) chuan Planning department-a under secretary hnenah Siaha bialtu MLA Dr K Beichhuaa'n kum 2015-16 MLA fund aṭangin damdawi leina leh clinic a hawnna atan Rs. 6,50,000 hman chungchang a thlen. Siaha biala thingtlang khuaa mipui hriselna turin a thlawna damdawi sem tur leina atan hman a nih thu te, Siaha district chu IMR leh MMR sanna a nih avangin sum hmanna chu pawmpui turin a ngen a ni.

Planning department under secretary chuan Siaha bialtu MLA sum hmanna chu GPC sawifiah turin January 27, 2016-ah Assembly Secretary hnenah a thawn. Assembly Secretary chuan February 5, 2016-ah Planning U/S hnenah thawn lêtin, Assembly Speaker leh GPC Chairman ni bawk hoin ngun takin an enfiah a, MLA fund hmanga damdawi lei leh clinic hawn chu MLALADS kaihhruaina para 2:1 leh 2:2 nen a inmil loh thu leh, MLA Dr K Beichhua chu sum hman a remchan loh dan thurâwn pe turin a hriattir.

Planning department chuan February 11, 2016 khan Siaha district SDO hnenah, Dr K Beichhua chu MLA fund hman chhunzawm tawh lo tura thurâwn lo pe turin a thawn a ni. June 23, 2016-ah Lunglei district-a SDO pakhat chuan, West Tuipui bialtu MLA NK Chakma-in mimal paruk hnena MLA fund hman a dil chungchangah  Planning hnenah thurawn a la a, Planning chuan Assembly Secretary hnenah July 5, 2016-ah GPC sawifiahna a dil ve leh a ni.

Assembly Secretary chuan July 22, 2016-ah Planning hnenah, Speaker leh GPC Chairman-te'n ngun taka an ngaihtuah hnuah, MLA fund chu mimal atan hman theih a nih loh thu a hriattir. May 11, 2016-ah Aizawl DC Kannan Gopinathan chuan Plan­ning Secretary hnenah lehkha thawnin, MLALADS kaihhruaina ṭhenkhat chu sawifiah turin a ngen a, chuvang chuan Planning department chuan Assembly Secretary hnenah May 18, 2016-ah GPC sawifiahna a dil. July 22, 2016-ah Assembly Secretary chuan Speaker leh GPC sawifiahna chu Planning hnenah a thawn.

GPC leh Assembly Spea­ker sawifiahnaah chuan, 'MLA­LADS chu mimal thil tih nan hman theih a ni lo,' tih a ni a; 'MLALADS chu ken sawn theih chi, entirna'n football, volleyball, silpauline, etc. lei nan hman a nih chuan, kaihhruaina anga signboard târ theih a nih loh avangin, MLA-te'n a hranga ziakin an chhinchhiah tur a ni,' tih a ni bawk.

April 28, 2017 khan Kolasib DC Arun T chuan Planning Secretary hnenah, MLA fund aṭangin 10% chu solar street light bun nan hman theih a nih leh nih loh a zawt a; Planning department chuan Assembly Secretary hnenah May 15, 2017-ah lehkha thawnin, GPC ngaihdan a zâwt chhâwng. Assembly Deputy Secretary-in May 22, 2017-ah a chháng lêt a, MLALADS kaihhruaina para 2:2 angin, MLALADS chu mipui leh khawtlang hman ṭangkai theih tur solar street light siam nan hman theih a nih thu a tarlang.

November 29, 2017-ah Lawngtlai DC Arun T chuan Tuichawng biala MLA fund hman dan turah Planning department - Principal Adviser-cum-Additional Secretary hnenah lehkha a thehlut leh a; MLA fund chu zirtirtu rawihna atan hman theih a nih leh nih loh a zawt.

Planning department chuan February 6, 2018 khan Assembly Secretary hnenah GPC sawifiahna a dil leh a, Assembly Secretariat chuan June 4, 2018-ah chhanna a thawn lêt. Chhannaah chuan, MLALADS kaihhruainaah a zawhnate chu a inziah thu a tarlang a, kaihhruaina chu an thil tel a ni.

February 15, 2018 khan Kolasib DC R Zarzosanga'n Planning Secretary hnenah, Kawnpui HSS-a hman atan tuizem litre 2,000 dawng lei a rem leh rem loh a zâwt a, bialtu MLA Hmingdailova Khiangte rawtna a thil tel. Kolasib DC hian February 19, 2019 khan Lungdai HSS-a thawk tur lecturer pahnih, kum khat chhunga rawih nan MLALADS hman a rem leh rem loh a zawt bawk.

Planning department chuan Kolasib DC zawhna chu GPC chhan turin Assembly Secretariat-ah a thawn a; mahse, GPC chhanna chungchang chu RTI Act hmanga zawhna chhannaah telh a ni lo.