SRS & MR-te'n dan loa damdawi hralh sawiho

Central YMA hnuaia ruihhlo dotu Supply Reduction Service (SRS) leh Mizoram Medical Representatives Association (MMRA)-te chuan August 10, Inrinni khan medical representative (MR) lem leh dan loa damdawi hralh chungchang CYMA pisaah an sawiho.

CYMA vice president leh Kumpuan chairman R Lalngheta chuan, ṭhalai ṭhenkhat, an damdawi ei pawh hre chiang lo, a ruih theih tih an hriat vanga ei ta mai an awm ṭhin thu sawiin, "Damdawi hmawm chi a hluar hian overdose-a thi an tam phah ṭhin," a ti a; YMA leh MMRA-te'n thawhhona ṭha tak an neih a ṭul thu a sawi.

SRS 10th Batch convener Roneihthanga chuan, heroin tihrêm tumin theihtawp an chhuah tih sawiin, "Heroin a tawm-im deuh tâkah chuan pharmaceutical drugs a hluar chho hle. Chuvang chuan, SRS hnuaiah Pharmaceutical Abuse Drugs Squad (PADS) din a ni a, damdawi pe chhuak ṭhin drug licence holder pahnih cancel tir tura ûm zui mek a ni," a ti.

Roneihthanga sawi danin, 'Make Aizawl City Clean and Safe' tih thupuia hmangin Aizawl khawpui thenfai tumin theihtawp an chhuah a, chhûn leh zanah an duty ṭhin a; ruihhlo ngai eng emaw zat chu chhan chhuah an nih theih nan gospel camping-ah dah luh an ni.

MMRA president Lalfingfela Royte chuan, "MR nia inchhal MMRA-a inziak lut si lo, ruihhloa inhnamhnawih, dan loa damdawi hralh rûa MMRA tihmingchhe záwnga che an awm ṭhin. Heng dan loa damdawi zuarte hi kum hnih chhung kan hrem bakah, thla ruk chhung hna thawk thei loin kan siam ṭhin," a ti. MMRA-te hian SRS te ṭanpui nan Rs. 5,000 an hlan a ni.