Aizawla leilung him lo laite sawiho

Aizawl District Disaster Management Authority (ADDMA) chu an chairman Vanlalngaihsaka, Aizawl DC hoin DC pisa conference hall-ah an ṭhukhawm a; Aizawla leimin nasatna hmun, leimin leh mai hlauhthawnawm leh thawm 

ṭhat ngai laite sawiho a ni.

Vaivakawn aṭanga Hunthar Veng panna kawng péngṭhuam bul, Vaivakawn leh Dawrpui Vengthar huam chhunga lei khi leh min hlauhawma awm mek chu a min belh lohna tura hmalak dan tur sawiho a ni. Sorkar hmalakna awm saah kawngpui thawm ṭhatna tur sum dah a ni a; meeting chuan, sum awm sa angin a rang thei ang bera hmalak ni se, plan leh estimate awm sa pawh a rang thei ang bera sanction a nih theih nan sorkarah thlen ni se, inspection team-in a hmun tlawhin zir chiang leh se, an ti.

ADDMA hmalaknaa joint inspection team-in lei khi an enfiah tawhnaah, kawng pengṭhuam bul vel mai bakah, a chhak lamah thui tak, Chief Minister bangla zawn thla kopang thlengin khî a awm tih hmuhchhuah a ni. Leimin leh mai hlauhawmna hmun, disaster prone area-a puang turin ramri (demarcation) an siam a; demarcation-in a huam chhungah leilung behchhana hmalakna thar - lei laih leh in sakte phal a ni lo.

Meeting-ah hian Bawngkawn-Lunglei road kawngpui bul lawka lei chê leh Dinthar Venga Evangelical Baptist Convention Church biak-in hmuna leimin tawhna hmun pawh sawiho a ni a; Dinthar Venga lei minna hmunhma chu tun dinhmunah a khîk belh tawh rih lo a, lei a chêt belh lo tih sawi a ni.

Bawngkawn-Lunglei road kopang chu a hmunhma tlawha zir chiang turin ADDMA chuan inspection team a din a; inspection team chu February 10, 2020 ral hmain an hmuh dan leh rawtnate ADDMA-ah thlen leh tura 

tih an ni.