KHAWTHLIR

Evangelical Church of Maraland (ECM) ṭhalai pawl, Bethel Branch KTP (Mara Thyatli Py) chuan nimin khan an kohhran hall-ah blood donation camp an huaihawt a, Saiha District Hospital tan thisen unit 21 an pe a, a petute mipa 16 leh hmeichhia panga an ni.

Nimin zing khan Ṭiau lui, Ramsuma kàiah mipa ruang chhar a ni a, nimin chhun khan Ṭhahleichuanga (37), Zokhawthar a ni tih hriat a ni. Thu dawn danin, ruang hi Ṭiau luiah tuiin a lên a, chu chu Ṭiau luia motor silte'n lo hmuin an la chhuak a ni.

MZP Sub-Headquarters, Falkawn chuan nimin khan an khuaah zirlai ti ṭhate chawimawina leh career awareness campaign an buatsaih a, bialtu MLA prof. F Lalnunmawia'n a hmanpui. 

Kumina YMA General Conference thlengtu tur, North Vanlaiphai khawtlang mipui chuan 72nd YMA General Conference Organising Committee bultumin nimin khan a ṭum khat nan inkhawmpui pandal sakna hmun tur an sâm fai. North Vanlaiphai mipuite chu October-a YMA General Conference thleng turin kawng hrang hrangin an inbuatsaih mêk zel a, khaw chhung chei mawi, faina lam, kawng thuam ṭhat hna an thawk chho mek a ni. 

PRISM party chuan thuchhuah siamin, Mizoram chhung Bairabi Zophaia Assam mite'n in an sak mek tihtawp a nih theihna atana Mizoram sorkar hmalakna chu an duhkhawp loh thu an tarlang a, "Assam nena ram inchuh kan neih chhunga Mizoram sorkar leh NGO-in hma kan laknate Assam lamin an tichhe vek zel a, tuna Zophaia Assam lamin hma an lakna, in an sak zawng zawng hi tihchhiat vek turah kan ngai," an ti. Lailapur-a Assam Forest ho inbun pawh nêk chhuah vek tura an ngaih thu an sawi.