Election Commission of India-in Lunglei district-ah Polling Station thar panga siam phalna a pe

Lunglei, Serchhip leh Mamit district-te tana electoral roll revision observer Sangdingliana chuan nimin khan Lunglei district-a electoral roll ennawnna kalpui mek a enfiah a, official-te nen an inkâwm. Election Commission of India (ECI)-in Lunglei district-ah polling station thar panga din phalna a pek thu tarlan a ni.

ECI chuan Lunglei district-ah polling station thar panga siam thar phalna a pe a; chungte chu - Maudarh, Old Rálvàwng, Tleu, Kauchhuah leh Bindasora te a ni. 

Electoral roll observer hian Lunglei district-a Election thawktute DC conference hall-ah a kawm a, electoral roll ennawn meka thil pawimawh hrang hrang a sawipui. Sangdingliana chuan, ECI-in ruahmanna a siam anga electoral roll ennawn mek enpui a, harsatna awm theite leh mamawhte ngaihthlaksak tura kal a nih thu a sawi.

Sangdingliana chuan, Lunglei district chu Bangladesh leh Myanmar international border nei a nih avangin fimkhur zual a ṭul thu a sawi a; electoral roll ennawnnaa mawhphurhna neite chu uluk leh fimkhur taka thawk turin a chah.

Lunglei Election officer J Miahlung sawi danin, Lungleia Election office-in a enkawl mek Assembly constituency pasarihah electoral roll-a thun luh thar dilna 4,256 a lut tawh a, hming paih dilna 1,481 leh particular tihdik ngai dilna 9,490 a lut tawh.

Polling station building ṭha tawh lo leh pan harsa pathum - Pukpui, Chanmari-II leh Lunglei Electric Veng-te chu hmun danga sawn phalsak an ni a; Zohnuai polling station chu hmun pahnih - Zohnuai West leh Zohnuai East-ah ṭhen phalsak a ni bawk.