Market security company-ah fimkhur a ngai

Mizoram police chuan thuchhuah siamin, ram hmasawnna avangin tunlaiin market security company hrang hrang Mizoramah an lo lut ve ta zel tih an tarlang a; ṭangkaina leh hmasawnna a neih rualin, market security company-a authorized person nih avang ngawtin tuma'n mipui aṭangin deposit an dawng thei lo tih an sawi.

Police thuchhuah chuan, market security company-te chu ṭangkai leh hmasawnna atana hmangtu an awm laiin, mi ṭhenkhat, market investment lam hre chiang lo leh dan loa a pung sang tak pek turin mipuite sum lak/pûksaka tlakchhiatpui an awm nual tawh tih a tarlang a, "Heng inbumna avang hian mi tam tak an thawhrim rah sum tam tham tak tak chán leh hloh eng emaw zat an awm tawh. Chuvangin, mipuite kan fimkhur a ngai a ni," an ti a, mipui fimkhurna turte an tarlang.

•    Mi tu pawh market security company-a authorized person nih avang ngawtin tuma'n mipui deposit an dawng thei lo.

•    Securities company-ah investment i ti duh a nih chuan mahni demat account-ah chauh investment tih tur a ni. I pawisa chu i bank account aṭanga chhuakin, i demat account-ah a lut ang a, a hlâwkna nen a lo kîr leh hunah pawh mi dang account-ah lut kual loin leh khawih chingpen theih lohin i account-ah chiah a lo kîr leh ang. Risk investment a nih avangin fimkhur erawh a ṭul.

•    Securities company-a authorized person emaw, investor dang an ni emaw, pawisa fai an hnena pek luh theihna dan a awm lo a, pawisa/cheque transfer, etc. i pe lut a nih chuan dan lo leh dinhmun him loah i lut tihna a ni.

•    Investment him leh him lo chungchangah hriat belh duh nei leh thurâwn la duh tan Economic Offences Wing (EOW), CID (Crime), Bungkawn, CID Complex-ah zawhfiah theih a ni. Telephone no. 0389-2335250.