Sorkarin aikal lak a phal lo - Edn. Minister

School Education minister Lalchhandama Ralte chuan nimin khan SCERT Auditorium-ah primary school leh middle school zirtirtu atana lak tharte tan ni hnih awh tur induction training a hawng a; sor­karin aikal lâk a phal loh thu sawiin, aikal lak tumte chu an hna aṭanga inthiar fihlîm turin a chah.

Minister Lalchhan­dama Ralte chuan, tun hnaia MPSC kaltlanga primary school leh middle school zirtirtu atana lak thar mi 153-te chu an hna an zawm veleh an awmna hmuna ṭha taka awm nghal chat tam tak an awm thu a sawi a, "Chutih laiin, mi pali/panga vel chu hna an zawm hnu lawka aikal lak tur melh nghal leh transfer kherh nghal an awm. Sorkarin aikal lak a phal lo a, aikal lâk tumte chu inthiar fihlîm mai turin ka chah a ni," a ti.

Tun hnaiah zirtirtu zingah anmahni ngeiin minister hmu a, transfer dil ngâwng ngâwng an awm tih sawiin Lal­chhandama Ralte chuan, "Hei hi tih loh tur a ni a, minister hnen thlen ngai a nih pawhin, dan anga dilna siam tur a ni," a ti. Thingtlang hmun hrang hrangah mamawhna avangin zirtirtute chu dah an ngai tih sawiin, "Zirtirtute hi anmahni post ṭheuhah an lungawi a, an mission field a ni tih an pawm tur a ni," a ti a; an awmna tura hotute'n an tihna apiang chu zirna siamṭhatna kawnga koh an nihna hmun a ni tih pawm turin a chah.

School Education Minister chuan, zirtirtu lak tharte chu hun vawng dik tur te, sikul ṭan hun dar 9 chu ngai pawimawh tur te, ṭan hmain naupangte sikulah lo chiau-au hman tur te, sikul leh a chhehvelte vawng fai a, naupangte che vel thli­thlai ṭhin turin a chah. Inthuamna leh nihphung­ah zirtirtu ni âwm rênga awm tur leh zirtirtu hna chu hna zahawma siam tura fuihin, "Zirtirtute zingah khawlaia zu rûi sawi tur an awm leh zauh ṭhin a, chutiang zingah chuan in tel loh a ṭha ang. Zûk leh hmuam, ruih theih thilah leh zirtirtu tih atana mawi loahte in inthiar fihlîm a ṭul," a ti.

Lalchhandama Ralte chuan, zirtirtute chu an thawhna sikul ṭheuhah neitu nihna thinlung nena enkawl tur te, a bula mite'n an nêk pawhin hum tlat tur te, sikul ram nék an awm chuan thuneitute hnena thlen vat tur te, naupangte thinlungah Mizo nationalism, aia upa zahna leh nun dan ṭha tuh tum tlat turtein a chah bawk.

Induction training-ah hian conduct rules leh departmental standing order te, integrated evaluation scheme te, question setting, ICT hman dan, teaching aid, practical class leh service atana pawimawh chi hrang hrangte an zir dawn a ni.