Chak zawka Act East Policy kalpui turin LS MP-in a ngen

New Delhi-a Par­liament Library-ah nimin khan prime minister Narendra Modi hoin Parliament-a political party hrang hrang MP-te an inhmukhawm a, Mizoram Lok Sabha MP C Lalrosanga pawh a tel.

MP C Lalrosanga chuan, Act East Policy hnathawh dan a chak tâwk lo hlea a hriat thu sawiin, chak zawka kalpui turin sorkar laipui hotute a ngen a; Parliament budget session-ah hmarchhak state-te sum mamawh ngaih pawimawh ni se a duh thu a sawi bawk.

C Lalrosanga chuan, India hmarchhak bial state-te tana sorkar laipui leh a department hrang hrang hnuaia budget aṭanga 10% dah ṭhin (Non Lapseable Central Pool of Re­sources) chu a nihna ang taka hman a ṭul thu te, NLCPR chu hman mumal a nih loh avangin a tling khawm a tam tawh thu te, a rang lama zâi taka hman ngei a ṭul thute leh, sorkar laipui budget chu kum tharah hmarchhak state-te tana tihpun a nih ngei a beisei thute a sawi bawk a ni.