Book Fest cum Writers Meet ṭan a ni
Mizo Writers Association (MWA) chuan nimin khan Vanapa Hall-ah Book Fest cum Writers Meet 2019 an buatsaih ṭan a, Art & Culture minister R Lalzirliana'n a hmanpui. Minister chuan, lehkhabu chhiar ngaisang tur leh uar turin Mizo mipui a sáwm.
R Lalzirliana chuan MWA buatsaih Book Fest cum Writers Meet chuan MWA member-te phûrna thar a siamsak a beisei thu sawiin, MWA member ni tawh sate bakah, member ni lo, thu leh hla lama tui tak takte tan leh lehkhabu chhiar ngaihlutute tan pawh malsawmna leh tuina thûk zawk petu a nih ngei a beisei thu a sawi.
Art & Culture Minister chuan,lehkhabu chu sawi loh, chanchinbu tak ngial pawh chhiar nacháng hre lo Mizo ṭhalaite zingah an pung nasa lutuk leh social media lamah an tlân nasa lutuk chu veiawm a tih thu sawiin, "Nu leh pate bakah, ṭhalai rual, kan ram nghahfâkte hian lehkha chhiar kan uar a ṭul tak zet a ni," a ti a, lehkhabu chhiar ngaisang tur leh uar turin Mizo mipui a sáwm.
Lehkha chhiarin thil thlir dan leh rilru sûkthlêk a ṭha zawngin a kaihruai ṭhin tih sawiin R Lalzirliana chuan, "Kan thluak tan insawizawina min siamsak a, finna leh hriatna tihzauna hmanrua pawimawh tak a ni a, ziak lama hmasawnna bakah ruahmanna leh ngaihruat thiamna min siamsaktu ṭha tak a ni," a ti.
Minister R Lalzirliana hian lehkhabu pakua a tlangzarh nghal a; chu'ngte chu Lalhmachhuana Zofa lehkhabu buatsaih pathum, Mizoram GK Mini Edition Vol.4, 'Whatsapp Fiamthu leh Mizo Thawnthu Vol.8 te, Lalrinzuala Pachuau buatsaih 'Allah aiah Isua' tih te, B Lalthangliana lehkhabu buatsaih pahhnih - Mizo Literature (3rd Edition) leh 'Engtin awm ta zel ang maw' tih te, Lalzarzova Khiangte buatsaih 'The Man Eaters of Tsavo' tih te, C Lalzawna buatsaih 'Nupa hlim nan' tih leh 'Hmangaihzuali' tihte a ni.
Book Fest cum Writers Meet hi ni ruk chhung awh tur a ni a, August 17, Inrinni thlengin chawhma dar 11 aṭanga tlai dar 5 chhungin tlawh theih a ni dawn. Meet-ah hian lehkhabu chi hrang hrang 20% discount a zawrh a ni.