ZPM an ṭînsan zel - MPC party

MPC party hruaitute chuan nimin khan Aizawl Press Club-ah thuthar thehdarhtute an kâwm a; ZPM chu political party a nih tâk avangin miin an ṭînsan zel niin an sawi.

MPC treasurer V Lalṭhazuala chuan, mahni party chauh induhsak bikna ni lo, mi zawng zawng lenna tur mipui sorkar din duhin ṭangrual pawl din a nih thu sawiin, "Hemi duh lo hian mi ṭhenkhatte'n mipui sorkar ni lo party induhsak bik theihna tur sorkar bawk din duhin ZPM chu ṭhiatin political party-ah an kîr leh tâk avangin, ZPM phûr taka support ṭhinte'n an ṭînsan mek zel. Hetih lai hian, MPC chuan Zoram siamṭhatna tura party leh pawl ṭhiat kher loa mi zawng zawng len theihna huang kan siam tawh kha tihlawhtling turin hma a la zel dawn a ni," a ti.

V Lalṭhazuala sawi danin, ZPM inde­pendent MLA-te'n a huhoa ṭang­ruala inthlan an hmachhawn avang­in Assembly Speaker-in Assembly-ah ZPM Legislator angin a huhoa ṭhutna a siamsak a ni. Tunah chuan Election Commission of India-ah July 3, 2019-ah political party anga register chauh a nih avangin, ZPM party angin inthlan an la hmachhawn lo a, chuvang chuan ZPM party-in MLA an la nei loah an ngai a ni.

Serchhip Block MPC ṭhiah a la ni loa sawiin V Lalṭhazuala chuan, "Serchhip MPC Block President leh Secretary-te'n August 5, 2019-a thuchhuah an siamah, Serchhip MPC Block ṭhiah a nih thu leh MPC party a bo a bâng awm loa ZPM-ah an inchhûn luh vek thu an puan kha thu belhchian dâwl lo a ni. Block ṭhiah theihna thuneihna hi block committee thuneihna a nih loh avangin Serchhip MPC Block hi ṭhiah ni loin, hruaitu ṭhenkhatte'n ZPM an zawm mai a ni," a ti.