KHAWTHLIR

Mizoram sorkar chuan August 8, 2019 khan State Planning Board a din thar a; chairman chu chief minister Zoramthanga a ni a, vice chairman chu H Rammawi a ni. Member-ah Mizoram chief secretary leh Finance commissioner & secretary an awm. Planning Board-ah hian Planning & Prog-ramme Implementation department secretary chu member secretary a ni a; sorkar official ni lo member dangte chu - Liansuama, N Zokunga, MCS (retired) leh Lalthansanga, MFAS (Retired)-te an ni.

Kristian Ṭhalai Pawl, Mumbai chuan August 12, Thawhṭanni khan TATA Hospital, Mumbai-ah blood donation camp an huaihawt a, KṬP member mi 24-in thisen an pe. Zawlnuam Bawrai Branch KṬP pawhin August 10, 2019 khan Mamit District Hospital tan thisen unit 35 an pe a, a petute mipa 26 leh hmeichhia pakua an ni.

Excise & Narcotics department (END) chuan July thla chhung khan zu zuar mi 235, zu rûi mi 14 leh rakzu litre 10,791.68 an man. END hian July thla chhung vek khan zu bilh lai ṭín 13,619, zu siamna dàwidim kg. 12.9, sap zu ml. 750 ûm 1,158, ml. 375 ûm 112 leh ml. 180 ûm 24, Myanmar zu BEDC litre 494, beer eng emaw zat, zu sakna bél 299 leh zu kaihhnawihah motor 26 an man bawk.

Minister of state Lalruatkima chuan nimin khan MZP Pisapuiah GIG Motors Scholarship a sem. Scholarship hi kumin HSLC exam-a top 10 chin zirlai 20 hnenah hlan a ni a, zirlai pakhatin kum khat atan Rs. 12,000 zel an dawng a ni.

BSF chuan civic action programme hnuaiah nimin khan Mizoram khawthlang lam ramri hrûla khaw hrang hrangah hmanrua leh bungrua chi hrang hrang an sem. BSF hian khaw pathum - Silkur, Tippereghat leh Borapan-suri-ahte thilpek hlanna hun an hmang a; 159 Bn BSF commandant Binner Paul chuan football, volleyball, infiamna pheikhawk leh infiamna hmanraw hrang hrang a sem a, puanṭhui kháwl, water filter leh tuizémte an sem bawk.