Chite humhalh thlalak inelna lawmman sem

Chite lui thlalak nalh intihsiakna, SaveChiteLuiClick, Save Chite Lui Coordination Committee-in an buatsaihah nimin khan result puanna leh lawmman semna inkhawm Secretariat-a Chief Secretary conference hall-ah neih a ni a, Enviroment, Forest and Climate Change (EFCC) minister TJ Lalnuntluanga'n a hmanpui. 

TJ Lalnuntluanga chuan, chite lui humhalhna tura hmalakna chu a thlàwp thu leh chief minister Zoramthanga pawhin theihtawp chhuaha hmalakpui a inhuam thu sawi a; Mizorama lui dung, tui laknate humhalh kawngah sorkarin theihtawp chhuah a tum thu leh sorkar hmalakna chu mipuiin an ṭawiawm a ṭul thu sawiin, lui, thing leh mau leh nungcha humhalhna kawngah rilru thar pu turin mipui a chah.

SaveChiteLuiClick-ah hian category pahnih siam a ni a; category-I (lui thlalak)-ah mi 35-in thlalak an thehlut a, category-II (selfie)-ah thlalak 14 a lut. Thlalak endiktute zinga mi Laldin­tluangi Tochhawng-in thlalak an endik dan a sawifiah a; lawmman dawngtute hnenah EFCC Minister-in lawmman a hlan.

Lawmman dawngtute chu - category-I aṭangin pakhatna Dennis Varte leh pahnihna C Rothangliana te an ni a, category-II aṭangin pakhatna Kevin Malsawm­tluanga leh pahnihna Bethsy Laldinpuii te an ni.