India Forest (Amendment) Bill, 2019 Mizoram tan him loah MPCC-in ngai

Mizoram Pradesh Congress Committee (MPCC) chuan thu­chhuah siamin, India Forest (Amendment) Bill, 2019 chu Mizoram tan a him loa an ngaih thu an tarlang a, Mizoram tana him lo laite siamṭhat a nih theih nan hma la thuai turin Mizoram sorkar an ngen.

MPCC chuan, sor­kar laipuia Ministry of Environment, Forest and Climate Change-in 'The Indian Forest Act, 1927' siamṭhatna tur a buaipui mek, India Forest (Amendment) Bill, 2019-ah Mizoram tana him lo thil tam tak a awm nia sawiin, "He dan siam thar tura rawtna hian India Constitution hnuaia inhung bikna kan neih Article 371G (a-ii, iii & iv) nasa taka a palzût dawn avangin Mizoram tan a him lo hle," an ti.

Congress party chuan, India Forest (Amendment) Bill, 2019-ah rua­hman a nih danah, "Forest officer-te thuneihna sang tak pek tum a nih avangin mipui dikna leh chanvo nasa taka palzût a hlauhthawnawm thei a ni," an ti a; a bikin thingtlang mite eizawnna thlenga nghawng chhe tak nei thei a nih avangin an ngaih pawimawh thu an sawi.

MPCC chuan, Ministry of Environment, Forest and Climate Change-in dân a siamṭhat tur chungchangah, Mizorama non governmental organisation / civil society organisation-te nena inràwn khawmna (consultation) buatsaih tur leh, a rang lama rawtnate Ministry-a thlen tura state sorkar a hriattir tawh angin, Mizoram sorkar pawhin inràwn khawmna a rang thei ang berin buatsaih an duh thu an sawi a, "Mizoram tana him lo laite siamṭhat a nih theih nana hma la thuai turin Mizoram sorkar kan ngen a ni," an ti.