Ngur-in Model village-a puan an lawm

Health & Family Welfare Board vice chairman Dr ZR Thiamsanga, MLA chuan nimin khan a bial, Champhai North constituency chhunga a model village atan Ngur a thlan thu a puang a, Ngur khuaah hian community hall-ah model village puanna leh lawmna inkhawm neih nghal a ni.

Dr ZR Thiamsanga chuan, Ngur khaw mipuite inlungrualna leh thawhhona fakin, model village ni âwm taka a ngaih thu leh khawtlang inlungrualna leh phûrna chuan amah pawh chona a pek thu a sawi a; Ngur khua chu nasa taka tihhmasawn tum a nih thu sawiin, "Hemi kawngah hian mipui koah mawhphurhna tam tak a tla a, hmasawnna ruhrel siam tum a ni dawn  a, kan tih ṭhin ṭha lote kan bânsan a ngai. Khaw dang entawn nih kan tum dawn a, sorkar aṭanga tih tur awmte pawh a ṭul ang zela bawhzui a ni ang," a ti.

Model village a nih anga Ngur khaw tana hmalakna hmasa atan Health sub-centre tihchangtlun a, B.Sc. (Nursing) viltir tum a nih thu sawiin ZR Thiamsanga chuan, "February aṭangin MLA fund hmangin health worker pawh dah tum a ni," a ti a; EFCC department  kaltlangin cheng nuai 10 hmangin khaw chei mawi leh ramngaw humhalh hna kalpui tum a nih thu te, ni zung chakna (solar energy) hmanga tui pump chhuahna, tui  dahṭhatna leh pek chhuahna tur ngaihtuah a nih dawn thu te, Ngur Middle School building sak ṭhat tum a nih thute a sawi bawk.

Model village puanna leh lawmna inkhawm hi Model Village Organising Committee chairman LH Sawngpauva'n a kaihruai a ni. Champhai North bialtu MLA hian nimin zing khan Champhai Vengthlang Rahsi Venga Health Clinic a hawng a, Champhai District Hospital a tlawh bawk a ni.