Bairabi VC-te Zophai-ah Hnam dangin kut an thlâk
Nimin chawhnu khan Bairabi Zophaiah Bairabi Village Council member-te chu hnam dangin kut an thlâk a; he thil thleng duh lo hian Bairabi mipuite Zophaiah an pungkhawm.
Bairabi aṭanga Vanglaini thu dawn danin, Power & Electricity department mi leh sate leh Bairabi VC-te chu power line enfiah turin Zophaiah an kal a; Assam lamin Mizoram chhungah JCB hmangin kawng an lài ve bawk a, hei hi VC Vice President chuan video hmangin thla a la a ni.
Hna thawktute leh an thawhna bul vela awm hnam dangte chuan VC Vice President chu a video delete turin an ti a, a paih duh loh avangin tihluihna hmangin paihtir an tum a ni.
Hei vang hian VC-te chu an tlânchhia a, hnam dang 30 rualin ûm zuiin, an hmanraw ken ang angin an vaw zui a ni. VC Secretary chu hmun eng emaw zatah a hliam a, mi dang pawh hliamin, ngaihtuahawm lutuk erawh an awm lo.
He thil thleng hi an hriat veleh Bairabi mipuite chu an inko khawm nghal a, buaina thlenna hmun an pan a ni. Bairabi VC Secretary phone, chem leh scooty chabi-te chu he thu ziah lai thleng hian hmuh a la ni lo a, mipuite chuan hmuh ngei an phût a ni.
Thil thlenna hmunah hian Mizoram police-te an kal ve nghal a, Bairabi khawtlang hruaitute nen inbiain, hmalak dan tur an sawiho. He thu ziah lai hian an thutlukna hriat a la ni lo.