KHAWTHLIR

Finance additional secretary Ramchuana chuan nimin khan RBI conference hall-ah Financial Literacy Week, 2021 a hawng. Week thupui chu 'Credit discipline and credit from formal institutions' tih a ni. Bank aṭanga loan late hriat tur te, rinawm taka loan rulh a pawimawhzia te, loan lâkna financial institution-ah fimkhur a ngaih dante leh informal institution aṭanga loan lak a him loh dante sawifiah a ni.

Information & Public Relations (IPR) department leh Mizoram Art Development Society chuan nimin khan Ramtuk Thla Art Workshop, 2021 an buatsaih ṭana , IPR secretary Sang­dingliana'n Art & Novelty Gallery, Chaltlangah a hawng. Workshop hi ni li awh tur a ni a; Aizawl, Lunglei, Champhai, Tuidam leh Bairabi aṭangin artist 51 an tel.

YMA, Sub-Headquarters, Lunglei hruaitute nimina ṭhukhawm chuan, kumina an inkhawmpui chu March 18, 2021-ah Lungleia hman turin an rél. Ruahman lâwk dan chuan conference hi March 31 - April 2, 2020 chhunga neih tur a ni a, Covid-19 léng vangin neih theih a ni lo. YMA Sub-Hqrs, Lunglei hnuaiah hian group 12 leh branch 133 an awm a ni. 

Champhai SP Rex Zarzoliana Vanchhawng chuan, Tuipui lei leh Champhai inkar kawngpui NH-6, km. 130-150 siam mek a nih avangin lirthei tlân dan tihdanglam a nih thu a tarlang. Thupek chhuah aṭanga April 10, 2021 thlengin Tuipui lei - Champhai inkar kawngpuiah chhun dar 12:30 - 1:30 inkar leh, tlai 4:30 leh a tûk zing dar 9:30 inkarah chauh tlân theih a ni.

Nimin khan Kolasib bawrhsap Dr H Lalthangliana kaihhruaiin DC conference hall-ah sorkar hotute leh 73rd YMA General Conference Organising Committee hruaitute an ṭhukhawm a, Bilkhawthlira kumina YMA General Conference thlen dan tur an sawiho. He hun hi Bilkhawthlir bialtu MLA Lalrinsanga Ralte-in a hmanpui. 

Kolasib District Magistrate chuan nimin khan thuchhuah siamin, phalna/license nei lo chuan ammonium nitrate siam, state páwn aṭanga lâk luh leh state páwna phurh chhuah, kawl leh zawrh khap a nih thu a puang. Ammonium nitrate chu puak thei a nih avangin license neite pawhin Ammonium Nitrate Rules, 2012-in dahṭhat dan tur a sawi angin fimkhur takin a dahna tur hmun bik siam tur a nih thu a tarlang bawk.

Siaha district Disaster Management Authority chuan nimin khan Village Disaster Management Committee leh Quick Response Team-te tan ni hnih awh tur Disaster Management Training an buatsaih. Chhiatrupna laka invên theih dan leh chhiatna a thlen palha awmze nei leh him zawka chhanchhuah hna thawh dan tur zirho a ni.

State Referral Hospital-ah nimin khan Covid-19 vei dah luh belh an awm lo a, hripui laka fihlîm tawh mi pahnih chhuahtir niin, enkawl mek mi pathum an awm. SRH-ZMC Bulletin tarlan danin, SRH-a enkawl mek mi pathum zinga pahnih chu ICU-ah awmin, ventilator hmantir ve ve an ni a; Isolation ward-ah mi pakhat awmin, harsatna lian tham a nei lo.