COVID-19: Mizoram dinhmun Hripui vei mi 3 hmuh belh a ni
February 8, Thawhṭanni khan Mizoramah Covid-19 vei mi pathum hmuh chhuah a ni a, tualchhunga kai vek leh kàina hriat loh vek an ni. Nimin khan hripui laka fihlîm tawh mi pathum chhuahtir an ni thung.
Covid-19 vei mi pathum hmuh tharte chu Rapid Antigen Test (RAT) hmanga Aizawl leh Lawngtlaia hmuh chhuah an ni a; ZMC laboratory leh TrueNAT-PCR hmanga swab sample endik zingah hripui vei an awm lo.
Nimin khan Covid-19 laka fihlîm tawh mi pathum chhuahtir an ni a; SRH-ZMC aṭanga chhuak mi pahnih leh Kolasib SIRD CCC aṭanga chhuak mi pakhat an ni.
Mizoramah Covid-19 vei mi 4,386 hmuh chhuah a ni tawh a, mipa 3,209 leh hmeichhia 1,177 an ni. Nimin tlai dar 5 thleng khan mi 4,356 (99.32%) chhuahtir an ni tawh a, mi pakua (0.20%) thi tawhin, enkawl mek mi 21 (0.48%) an awm.
February 8, Thawhṭanni khan ZMC laboratory-ah swab sample 93, TrueNAT-PCR hmangin district paliah sample 34 leh RAT hmangin district 11-ah sample 1,052 endik a ni a; sample endik zawng zawng chu 1,179 niin, chu‘ng aṭanga Covid-19 positive hmuh chhuah pathum chu 0.25% a ni.
Thawhṭannia Covid-19 vei hmuh chhuahte chu mipa vek niin, hri an kàina chin hriat loh vek an ni a; Covid-19 symptom nei lo vek an ni bawk.
February 8, 2021 thlenga Mizorama swab sample endik tawh zat chu 2,16,510 a ni a, chu‘ng aṭanga Covid-19 positive mi 4,386 chu 2.03% a ni. Hripui vei hmuh tawh zinga mi 2,078 chu Mizoram chhunga kái an ni a, mi 2,308 chu Mizoram páwn aṭanga an rawn luh hnua hmuh chhuah an ni thung.
Mizorama district 11 zinga district pariat - Siaha, Champhai, Kolasib, Serchhip, Mamit, Saitual, Khawzawl leh Hnahthial district-ahte Covid-19 vei an awm tawh rih lo. District pathum - Aizawl (15), Lunglei (3) leh Lawngtlai (3) district-ahte chiah hripui vei an awm rih a ni.
Covid-19 vei hmuh tharte
Zemabawk - 1: Mipa kum 27, hostel-a luh dawn vanga sample endik a ni.
Sialsuk - 1: Mipa kum 51, Aizawla private hospital-a inzai tura lut, RAT hmanga endiknaa hmuh chhuah a ni.
Lawngtlai AOC Veng - 1: Mipa kum 22, hostel-a luh dawn vanga sample endik a ni.