MNF-in state sorkar nena thawk thei tur vote turin mipui an ngen

MNF party hruaitute chuan nimin khan Aizawl Press Club-ah thuthar thehdarhtute an kâwm a; AMC inthlan turah state sorkar chakna nena Aizawl khawpui hmasawnna hna thawk thei turin MNF party candidate-te vote turin mipui an sáwm. 

MNF adviser Lalruatkima, MLA chuan, Zoramthanga hruai MNF sorkar chak takin a ding mek nia sawiin, "Aizawl khawpui hi Smart City Project kalpuina tur zinga mi a nih avangin hmasawnna ruhrel chi hrang hrang ruahmanna kalpui mek a ni. Sorkar nena pheikhài rual taka kal thei tur, AMC chakna mai ni lo, state sorkar chakna nena Aizawl khawpui hmasawnna hna thawka hmá la thei tur MNF vote vek turin mipui kan ngen a ni," a ti. 

Lalruatkima chuan, MNF sor­karin AMC a ngai pawimawh nia sawiin, "MNF sorkar chuan kum khat chhungin AMC-ah post 98 a siam thar a, ni 21.10.2020 khan The Mizoram Municipality Common Cadre Service Rules, 2019 leh The Mizoram Municipality Subordidate Service Rules, 2019 a tichhuak. Rules hmang hian kum 10 chhung AMC thawktu service condition chu nasa taka siamṭhat a ni," a ti a; tun hnaiah mi 48 dah ngheh a nih thu a sawi. 

November 21, 2019 khan Assembly House-ah 'The Mizoram Municipalities (Amendment) Bill, 2019' pass a nih thu sawiin Lalruatkima chuan, "Hengte hi kum 10 chhunga Congress sorkarin a lo tih lohte kha a ni a, kum hnih/ khat lek chhungin MNF sorkar chuan AMC hi thuam chakin a chei ṭha nasa hle a ni," a ti. 

MNF Adviser chuan, Central YMA hmalakna lawmawm an tih thu sawiin, "CYMA leh PWD-te MoU an siam angin, kawng siam hna thawh mek an enfiahnaah sorkar hmasain hna a lo pek 16 zet mai contractor-te thawh danah ṭha tâwk lo leh fel tâwk lo an hmu a ni," a ti a; CYMA chu an hmalakna chhunzawm zel tura an beisei thu a sawi.

Congress party-in Mizoram sorkar sum dinhmun a ṭha lo a, RBI aṭangin ways & means hmangin sorkarin sum a pûk nasat thu an sawi chungchangah Lalruatkima chuan, "Vanglaini ni 9.12.2014-ah‚ Kum thum chhungin Ways & Means-in RBI-ah vawi 118 pawisa pûk a ni,‘ tiin sum indaih lohna avangin RBI aṭangin Congress sorkar khan sum a pûk thu a tarlang. Covid-19 vanga khawvel sum leh paiin harsatna naménlo a tawh lai hian Mizoram sorkar chuan sum enkawl kawngah theihtawp a chhuah a ni," a ti.

MNF Adviser chuan, kum 1987 aṭangin Aizawl khawpui lailí aṭanga Assam Rifles sawn chhuak turin MNF-in hma an la tawh nia sawiin, "Kum 2018-a MNF ministry a pian khan hmalakna hmasaah nei leh nghalin, Ministry of Home Affairs chuan Assam Rifles headquarters chu Zokhawsanga insawn turin a rawn hriattir a. Chhuanlam chi hrang hrang an neihte state sorkarin a tihhlawhtlin zel avangin MHA chuan May 2020 ral hma ngeia Zokhawsanga insawn turin a rawn hriattir leh a ni," a ti a; Covid-19 vangin hmalakna a chak loh thu a sawi.

Chief Minister-in Assam Rifles-te February 2021 chhunga Zokhawsanga pém vek tura an nawr thu a sawi chungchanga zawhna chhangin Lalruatkima chuan, "Tunah pawh eng emaw zat an awm a, an vaia an insawn hman loh pawhin a rei tawh lo ang," a ti.