AMC-a MNF sorkarin ram leinaah Cheng nuai 97 an tichingpen - MPCC

Mizoram Pradesh Congress Committee (MPCC) hruaitute chuan nimin khan Aizawl Press Club-ah thuthar thehdarhtute an kâwm a; AMC-a MNF sorkar kal ta (2015-2020) chu ram leinaah cheng nuai 97 tichingpenah an puh a, sum chingpen chu AMC hotu tute emawin an fanghma no ei tih a chiang niin an sawi.

Congress Legislature Party (CLP) member Lalrindika Ralte chuan, AMC-in park leh solid waste management centre atana ram a lei danah thil fel lo tam tak a awm tih hriat chhuah a nih thu a sawi a, "Ailawng leh Sihphir Neihbawi-a ram pahnih leinaah cheng nuai 97 zet a chingpen a ni. A hmunhma sâwng­bàwlnaah pawh cheng nuai tam tak a chingpen ngei niin a lang," a ti.

Lalrindika Ralte sawi danin, AMC hian kum 2018 khan Ailawng ramah AMC Park tur ram bigha 12-a zau chu cheng nuai 98-in an lei a ni. Ram chu Rinsangpuia s/o C Seichhunga (L) hnen aṭanga lei angin document-ah lang mah se, ram neitu tak erawh chu Rochanmawia s/o Lalzawnga, Upper Republic a ni.

Ram lei nan cheng nuai 98 séng angin RTI Act hmanga zawhna leh Assembly session-a zawhna chhannaah tarlan a ni a; mahse, ram neitu Rochanmawia'n cheng nuai 40 chiah a dawng a, a bâk cheng nuai 58 chu an thehthangna hriat a ni lo. Ram chu Asian Bulls Construction and Developers Limited (ABCD), Aizawlah dah­kham (mortgage) lai mek a ni bawk a, mortgage a ni tih main gate-ah ziah lan a ni. 

Lalrindika Ralte chuan, company-a dahkham mek ramah hian MNF kaihhruai AMC sorkarin Rs. 24,60,570 séngin in an sak thu sawiin, "Ram chei nan Rs. 37,52,520 sên a ni tawh. Ram leina leh a sâwngbàwlna atan Rs. 1,35,52,521 sên tawh a ni. Hetiang a nih lai hian, building sak bak chu a ram cheibàwlna hmuh tur a váng hle," a ti.

Kum 2019 khan AMC-in Sihphir Neihbawihah solid waste management centre tur ram bigha 12-a zau cheng nuai 64-in an lei tih sawiin Lalrindika chuan, "Ram an lei thu leh an leina zat hi chiang takin RTI Act chhanna leh Assembly session zawhna chhannaah a lang a ni," a ti a; cheng nuai 64-a lei anga ziah a nih laiin, ram neitu Zahmingliana s/o Siamhrima, Sihphir Neihbawi chuan nuai 25 chiah a dawng tih a sawi.

Lalrindika Ralte chuan, ram laih zàwlna atan Rs. 22,23,400 sên a ni tawh tih Assembly session zawhna chhannaah a lan thu sawiin, "A hmunhma enin a zau lo hle a, a laih zàwlna atan cheng nuai 22 chuang sèn a ni hi a mak hle," a ti.

Zawhna chhángin Lalrindika chuan, "MNF kaihhruai sorkar thil tih dan hi ngawihbopui mai mai chi-ah ka ngai lo," a ti a; hmalak zel dan tur chu an party hruaitute‘n an la ngaihtuah loh thu a sawi.

MPCC hruaitute chuan, MNF party-in Aizawl khawpui an enkawl dan te, AMC sum an hman dik lote chu mipuiin an hriat a ngaih thu sawiin, "Pathian leh kan ram tan ti ṭhintu MNF-te hi Aizawl khawpui enkawl tlak an ni lo tih leh, AMC-ah pawh thlan tlin nawn chi an ni tawh lo tih mipuiin kan hriat a ngai a ni," a ti.