MNF-in dan an pawisa lo - ZPM

Zoram Peoples' Movement (ZPM) hruai­tute chuan nimin khan Aizawl Press Club-ah thuthar thehdarhtute an kâwm a; MNF party kaihhruai sorkar chu dan ngai pawimawh anga insawi, dan zawm tum chuang si lo leh dan pawisa loah an puh.

ZPM PAC member TBC Lalvenchhunga chuan, December 2020 khan MNF Legal Board-te chu sorkar hmunhma Adviser to Chief Minister pisaah an ṭhutkhawm tawh thu a sawi a; tun hnaiah Chief Minister's Office chu party thila hmangah puhin, "Serchhip biala an party candidate tur pawh Chief Minister's Office aṭangin an puang. Public office hi party thil atana hmang tawh lo turin kan ngen a ni. Hei hi dan kalh a ni a, dan an ngaih pawimawh tak zet chuan hmang tawh suh se," a ti.

TBC Lalvenchhunga chuan, an party chuan inchirhthehna awm loa kalphung thara kal an duh tih sawiin, "Hetih lai hian, thu dik tâwk loa inbeihna a rawn chhuak fo. MLA aṭanga Pu Duhoma an bàn hnuah, MLA dangte an vaukhàn leh a ni," a ti a; MNF chu hleilenna leh invauna atan dan hmang tawh lo tura an duh thu a sawi.

AMC chu Indian Constitution hnuaia mi a nih thu sawiin Lalven­chhunga chuan, "Dan­ah chuan AMC leh tual­chhung sorkar dangte state-in an sum hmuh aṭanga a pek ve tur duang tur Finance Commission din tur a ni a, mahse, MNF sorkar hian an din duh lo," a ti a; danin a phût angin AMC sum hman dan pawh CAG an endik (audit) tir duh lo tih a sawi. 

TBC Lalvenchhunga chuan, mipui sorkar ni lo, party sorkar din tum ni awm takin AMC-ah state ruling party mi thlang turin MNF an tlangau ṭhin tih sawiin, "Central sorkarin budget a pharh rual khan kum nga chhunga state sorkar leh AMC sum hmuh tur zat a hriat vek tawh. Tu pawh sorkar se a danglam dawn lo. Ruling ni leh nih lohin awmzia a nei lo," a ti.

ZPM consultant F Rodingliana chuan, Mizoramah Chief Minister-in PWD an chan ṭhin avangin kawng siamin a tuara a hriat thu sawiin, "An ṭul êm avangin kawng an enpui hman tak tak lo," a ti a; Mizoram CM-te‘n PWD an chan ṭhin chhan chu hna sema an buai vang a nih thu a sawi.

Contract hralh chhâwn, chumi hnua sub-contract tam lutuk ṭhin chu kawngpui chhiat chhan pakhat a nih thu sawiin F Rodingliana chuan, PWD pawhin hauh tur ber pawh an hre lo. Hetih lai hian, thil ti thei deuhte chuan bill an la char char thei tho si. Keini chuan hetiang thil hi tihtawp kan tum," a ti.

ZPM hruaitute chuan, MNF sorkarin SEDP hnuaia board 14 a din chu dan kalh a nih thu sawiin, MLA-te chu board vice chairman an nih avangin office leh hamṭhatna dang pek an ni a, hei hi office of profit a ni," an ti a; board dinna turin dan siam a nih loh thu an sawi a ni.