MSHCS Principal CEO post siam rêl

Mizoram State Health Care Society (MSHCS) Governing Body chu nimin khan an chairman Zoramthanga, chief minis­ter hoin CMO conference hall-ah an ṭhu a; hriselna MSHCS khawih thil chi hrang hrang an sawiho. MSHCS Chief Executive Officer chu Principal Chief Executive Officer tia thlâk an rél. 

Ṭhutkhawmah hian Mizorama cancer leh hepatitis enkawlna senso a hniam zawk theih dan tur sawiho a ni a; damlo inenkawlna kawnga huam zau zawka healthcare hamṭhatna neih dan ngaihtuah turin Chief Secretary kaihhruaina hnuaiah committee din ni se, an ti.

MSHCS Principal Chief Executive Officer (PCEO) post siam thar an rél a; MSHCS Chief Executive Officer (CEO) office tia hriat ṭhin pawh PCEO office tia thlâk an remti. Mimal damdawi-inte nena thawhhonate sawiho a ni bawk.

Sorkar thuchhuah tarlan danin, October 2020 aṭanga January 31, 2021 inkarah MSHCS hnuai­ah chhungkua 1,12,427 an inziak lut a, medical re-imbursement dilna 7,848 a lut tawh. Hemi chhung vêk hian AB-PMJAY scheme hnuaiah 4,33,842 hnenah golden card pek a ni a, MR dilna 935 a lut tawh a ni. 

Nimina ṭhutkhawmah hian Health minister Dr R Lalthangliana, Health & Family Welfare Board vice chairman Dr ZR Thiam­sanga, MLA, chief secretary Lalnunmawia Chuaungo, Health secre­tary H Laleng­mawia leh member dangte an tel.