Champhai MJA-in conference an hmang

Mizoram Journalist Association (MJA), Champhai District chuan nimin khan Champhai Press Club-ah Annual Conference vawi 33-na an hmang a, minister of state TJ Lalnuntluanga‘n a hmanpui.

TJ Lalnuntluanga chuan, chanchinbumite chu mipui sûkthlêk a ṭha zawnga her danglama zirtirtu an nih thu sawiin, "In thuchhuah tur leh thu dawnte finfiah ṭhin ang che u. Sorkar rorelna leh Champhai hmasawnna siam leh puanzar kawngah a laia lung pawimawh tak in ni," a ti a; puih an ngaihnaah hma lâkpuia enpui a tum thu a sawi.

MJA member-te chu mipui zirtirna leh siamṭhatna lamte tarlang tam tura chahin TJ Lalnuntluanga chuan, "Mahni ngei pên chhuaka thu dik leh zîktluakte mipui hnena chhawp chhuahsak in tum tur a ni," a ti a; ràwn tlak ni tura inzir turin a chah.

Champhai district-a ram ngaw chereu chak tak do nan NEC-ah ‚Afforestation of denuded hills in Champhai district‘ tih project thehluh a nih thu sawiin Minister chuan, "Pawm a ni tawh a, thing lian leh ṭhang duh turte mamawh leh enkawl zawh tâwk phuna enkawl puitlin tum a ni," a ti.

Champhai DC Maria CT Zuali pawhin thu sawiin, sorkar hmalakna te, mipui hnena hriat tur puan leh scheme pawimawhte puanzar kawngah MJA member-te‘n sorkar an ṭawiawm tlat ṭhin chu lawmawm a tih thu a sawi a ni.

MJA, Champhai district president Lalhmingmawia Pachuau chuan, sorkarin MJA a ngaihsak ṭhinnaah lawmthu a sawi a; media mite chu thuthang dik lo vawrh darh tam lutuk karah mipui hriat tur thu dik hriattir kawnga ṭan la lehzual tur leh mawhphurhna sang tak nei an ni tih inhre thar a, an hlutna vawng nung turin a sáwm.

Champhai district MJA hi December 31, 1988-ah Champhai Journalist Association tia din a ni a, February 11, 2006-ah MJA, Champhai district tia thlak niin, member 15 an awm. Champhaiah hian daily newspaper pathum leh local cable TV pahnih a awm mek a ni.