Party dang in vote chuan ni tlâk hnua nilum ài tum ang a ni ang - R Lalthangliana

MNF adviser Dr R Lalthangliana chuan AMC inthlan atan campaign in, nimin khan Ṭhuampui kàwna vantlang inkhawmah thu a sawi bakah, Thawhṭanni zan khan Electric Vengah thu a sawi a, "MNF ni lo, party dang candidate in vote chuan ni tlâk hnua nilum ài tum ang vel a ni ang," a ti.

Dr R Lalthangliana chuan, kum 10 chhung AMC liam ta chu Mizoramah Congress party sorkar lai a ni tih sawiin, "An din a nih loh avangin AMC kha an ngaihsak lo hle a, development lamah an ngaihsak hek lo, rorelna pawh a chîrî hle a, MPC councillor pakhat pawh Congress-ah a inleh phah a ni," a ti a; kum 2015-2020 chhunga AMC-a MNF sorkarin hmasawnna tura ruahmanna a neihte chu Congress sorkarin sorkar laipuiah a sawipui (recommend) ṭha duh lo niin a sawi.

Tunah chuan Mizoramah MNF a sorkar tawh tih sawiin R Lalthangliana chuan, AMC-ah pawh MNF rorelna a pian ngei dawn thu a sawi a, "State sorkarin ṭha takin a bawhzuipui ang a, hmasawnna lian tham leh hraw pui pui AMC aṭang hian kan hâi lût dawn. AMC-ah hian MNF ni lo, party dang candidate in vote chuan ni tlak hnua nilum ài tum ang vel a ni ang, awmzia a awm lo ang," tiin mipui a chah a ni.