Champhai Master Plan 2031 sawiho

Champhai Town Planning & Development Committee chu nimin khan Minister of state TJ Lalnuntluanga hoin Champhai DC conference hall-ah an ṭhu a; Champhai khawpui leh a chhehvel cheibàwla hmasawnna ruhrel siam dan tur Champhai Master Plan 2031 chungchang an sawiho.

TJ Lalnuntluanga chuan, Champhai khawpui ṭhan zelna tur ngaihtuah chungin Champhai Master Plan 2031 chu kum 2019-ah tharthawh a nih thu a sawi a, "Hun hmasa lama hmalak tawhna chuan vawiin hun hman hi a rawn hring a, Champhai Master Plan hi dan anga siama duhtâwk mai tur a ni lo a, rahbi thar nen bul ṭanna a taka hman tur a ni," a ti.

Minister chuan, Champhai Master Plan 2031 atan UDPA department-in kum 2020 chhunga data a lâk khawmte chu zir chianna hmasa zawh tawh a nih thu a sawi bawk.

Zirchianna (survey Aanalysis)-a a lan dan chuan, khawchhak lam (east) leh hmar (north) lam bawha ṭhan leh chhimchhak lam (south east) ring road siam mek zûlzuia chênna hmun zauh chu a duhawm ber dawna a lan thu sawiin TJ Lalnuntluanga chuan, "Draft Master Plan for Champhai 2031 hi enfiah theih turin tun thla ral hma ngei hian Committee hmaah pharh tum a ni a, rawtna leh  sawi duh nei tan tunkar chhung hun hawn a ni ang," a ti a; Master Plan chu March 2021-ah peih tum a nih thu a sawi.

Ṭhutkhawma tarlan danin, Champhai khawpui huam chhungah mi 45,225 an cheng mek a, kum 2011 chhiarpui aiin mi 12,491-in an tam zawk. Kum 10 hnu (2031)-ah chuan mi 59,589 an cheng tawh tura chhût a ni.

Champhai Master Plan hi Urban Development Plan hnuaia siam a ni a, kum thum chhunga peih hman tura tih a ni. Mizoram Urban & Regional Development Act, 1991 zûlzuia duan a ni a, ram hectare 4780.48-a zauah town planning kalpui tum a ni. Leilet phái záwl humhalh leh satellite town-te Champhai khawpui nen khairual taka kaltir chu ngaih pawimawh tur a ni bawk.