District huam chin turah kan duhâm lo - Dr R Lalthangliana

Dr R Lalthangliana hian a bial chhunga district headquarters thar Hnahthial chu nimin khan a thleng a, vawiin Independence Day lawmnaah khuallian a ni ang. Amah lawmna leh district thar an neih vanga lawmthu sawina inkhawm, nimin chhun khan Hnahthial Bazar kâwnah District Organising Committee huaihawtin an hmang a ni.

Dr R Lalthangliana chuan, "District tharah hian a huam chin turah kan duhâm hran lo a, lungsi taka awm duh chu lâwm takin kan pawm mai. Mualṭhuam South khua, in 100 khuain Hnahthial district-a awm an dil a, nimin maiah kan pawm a ni," a ti a; district thar neih vanga lawmthu sawi nan Hnahthial North-1 V/C member pahnih chuan MNF an zawm thar niin a sawi.

District tharin ken tel tam tak a nei dawn tih sawiin R Lalthangliana chuan, Hnahthial CHC ni ṭhin chu Hnahthial District Hospital a nih tawh dawn thu leh department hrang hrangah thawktu leh building thar tam tak a pun belh a ṭul dawn tih a sawi a, "District-in a ken tur a awm zel ang. District tharte tan hian 15th Finance Commission-ah pawh cheng nuai 1,300 vel kan ruahman fel tawh," a ti.

Dr R Lalthangliana chuan, Hnah­thial district chhungah Thing­sai lam kawng siam mek a nih thu te, Hnahthial-Haulawng kawng leh Pangzawl-Chhipphir kawngte chu a rang thei ang bera thawh tum a nih thu a sawi. District-a an puan tawh district pathumte chu kum 2008 inthlanah an tlin loh avangin kum 10 chhung bawhzui lohin a awm tih sawiin Dr Thangtea chuan , "Pu Zoramthanga kaihhruaina hnuaiah kan lo sorkar leh ta a, naktuk zing dar 8 aṭangin national flag kan pawt pharh dawn ta a ni," a ti a; district thar an neih avanga lawmthu sawi fo turin district mipuite a chah.

Hnahthialah hian district bawrh­sap thar Vanlalmawia leh superin­tendent of police thar Dinesh Mala te chawimawina parṭhi an awrhtir a; MLA pathum - Lalrintluanga Sailo, Lalzirliana leh Dr ZR Thiamsanga te pawh an tel a ni.