Veterinary Hospital sakna tur drawing AH&Vety leh a satute kawl a intiat lo

MJA, Lunglei District member-te chuan nimin tlai khan Lunglei Farm Venga Vety Complex-a Veterinary Hospital tur sak mek chu an tlawh a, Lunglei DVO Dr Vanlalbuanga leh a thawhpuite'n lo dawngsawngin, in sak mek an enfiah. In sakna atana AH&Vety department drawing leh AIE company engineer-te drawing an inang lo hle niin an tarlang.

Vety Hospital tur hi NABARD (RIDF-XII) sum cheng nuai 85 hmanga sak mek a ni a, a satu chu Architectural Interior Engineering Company (AIE), Tuikhuahtlang, Aizawl an ni. Building an sakna chin zau zawng chu ft. 62.3X46 a ni a, a ban phun zawh a nih tawh bakah, tie beam chhûn zawh a ni tawh. Building sak mek chu AH&Vety Minister-in a hmunah a tlawh tawh a, a sak danah duhthu a sâm lo hle tih a sawi tawh niin Lunglei MJA-te chuan an tarlang.

Hospital building tur sak hna thawktute enkawltu supervisor chuan, architect drawing leh estimate zat a hriat ve loh thu leh, Aizawl aṭangin engkim tih a nih thu a sawi a; chuvang chuan press mite zawhna chhàn theih loh a nei nual.

Lunglei MJA chuan, building sakna tura AH&Vety department-in supervisor hnena drawing an pek leh AIE company engineer-te'n drawing an kawl a inang lo hle tih an sawi a, "Department lamin drawing an neih chu a lian fé zawk a, a satute kawl lai drawing hi a tê zawk a, sum senso tur pawh a tlem zawk," an ti a; chumi chungchangah chuan nimin khan AH&Vety department hotute leh AIE aiawhte chuan Aizawlah an sawiho nghal nia an hriat thu an tarlang.

Chanchinbumite chuan, in sakna atana lung an hman chu a ṭha tâwk lo a, a no hle tih an sawi a, "Anni pawhin hmang tawh loin, paih vek an tum a ni," an ti.