A nih tur ang ni lo sangha chi supply pawm a ni tawh dawn lo - Fisheries Minister

Sangha khawia eizawngte tan nimin khan Kolasib DFDO-ah training buatsaih a ni a; khuallian K Lalrinliana, Fisheries minister chuan, sangha chi, a nih tur ang ni lo supply chu pawm a nih tawh dawn loh thu a sawi.

Training hi Fisheries director C Laldawngliana'n a kaihruai a; K Lalrinliana chuan, supplier-te'n tender an chhàn ang ngeiin sangha chi an supply tur a nih thu sawiin, "Sangha chi sem chhuah a nih leh hunah a nih tur ang tak supply a nih loh chuan pawm a ni tawh dawn lo," a ti a; sangha chi dik lo supply an awm chuan hék turin sangha khawitute a chah.

Fisheries Minister chuan, sangha chi sem turah an khauh dawn thu sawiin, "Department lam pawh complaint a awm a nih chuan hrem theih in nih avangin, fimkhur turin ka duh che u. Sangha chi a nih tur ang ni lo sem a nih ṭhin avangin sangha dil neitute'n an sangha thar tur ang an thar theih loh phah. A nih tur ang ni lo sangha chi supply chu sangha khawitute pawhin pawm loh ngam tur," a ti.

K Lalrinliana chuan, sangha khawiah hlâwkna tél tur chuan awmze nei taka kawng hrang hranga hmalak a ngaih thu sawiin, "Sangha chi siam/thar chhuah a ngai a, sangha khawi hmain dilah leiṭha dah a ngai. Dîl kama sangha chaw tur chìn te, sangha chaw pek ṭhatte bakah, dila pâtêk thenfai peih a ngai a ni," a ti a; sangha chi dah tur thlan fimkhur a ngaih thu a sawi bawk.

Training-a an tarlan danin, Fisheries Directorate record an neihah kum 2018-19 khan Mizoramah sangha dil nei mi 16,263 an awm a, Kolasib district bikah sangha dil nei mi 2,980 an awm. Kolasib district hian kum 2018-19 chhung khan sangha metric ton 1,833.20 an thar a ni.