KHAWTHLIR

Vawiin hi Independence Day a nih avangin Ai­zawl District Sub-Divisional Magistrate chuan thupek a chhuah a, I-Day lawmna tur Lammual leh sorkar mi pawimawhte kalkhawmna tur Raj Bhavan chung­ah te, Chief Minister office/bangla chungahte remote control hmang drone/aerial camera leh a kaihhnawih thil rêng rêng thlawhtír khap a nih thu a puang. He khapna thupek hi vawiin August 15 bik atan a ni.

Lunglei district-a Mau­sen Joint Action Committee (JAC) chuan Aug­ust 13, Thawhlehni khan an khaw ram chhunga khaw dang miin zu an siamna hmunte an dap a, zu bilh lai zém pathum an tihchhiat bakah, zu sakna hmanrua - belpui pathum, bél tê deuh pali, bur pathum leh bucket pali an man. Mausen JAC chuan, an khua chu dry area a nih avangin an khaw chhungah zu lak luh leh an khaw ram ­chhungah zu siam an phal loh thu an tarlang.

August 13, Thawhlehni tlai dar 4:30 vel khan Diltlang leh Chawngte lui kai inkar Damlui bulah Ashok Leyland tipper pakhat a chesual a, a hmunah B Laltlanzova s/o B Lalliana (L), Chawngte-P a thi. Thu dawn danin, tipper hi Lawngtlai lam mi motor a ni a, an chetsual lai hian driver nen mi pali an chuang a, mi pakhat a thih bakah hian, mi dang­te pawh an hliam a ni.

Central YMA hnuaia ruihhlo dotu, SRS leh Excise & Narcotics department-a Anti Narcotic Squad-te chuan August 13, Thawhlehni khan Seling Dawrkawn­ah heroin (no. 4) hawng 13 (gram 195) an man. Heroin neitua puh Sang-

ṭhuama (50) s/o Thanseia, Seling Vengsang, tuna Zokhawthar Field Venga khawsa mek nia insawi an man bawk.