Ukil hna zahawmna tibawrhbângah Adviser to CM Lalramzauva an puh

Lai District Congress Com­mit­tee (Lai DCC) chuan thuchhuah siamin, adviser to chief minister C Lalramzauva chu ukil hna zahawm tak tibawrhbángtua an ngaih thu an tarlang.

Mizoramah MNF party-in sorkarna an chelh hnu lawk aṭangin autonomous district council (ADC) pathum - LADC, CADC leh MADC-ah sorkar kal lai nam thlûk tumin an bei nghal tih sawiin Lai DCC chuan, "LADC-ah MNF treasurer Vanlalzawma leh TC Pachhunga, GS te rawn kalin, Congress MDC ṭhenkhatte an tlawn chhuak a, LADC-a Congress sorkar nasa takin a buai phah a, High Court thlen ngai khawpin harsatna an siamsak a ni," an ti.

Lai DCC tarlan danin, LADC-a Congress Legislature Party (CLP) chhuahsantu MDC pangate chu High Court-ah khin an ni a, MDC pangate chu adviser to chief minister (cabinet rank) C Lalramzauva, senior advocate-in Gauhati High Court-ah a dinsak a ni.

Adviser to CM a nihna bànsan si loa C Lalramzauva'n ukil hna a thawk chu a hria apiangin mak an ti tih sawiin Lai DCC chuan, "Mizoram mipui a timualpho a, ukil hna zahawm tak pawh a tibawrhbang a ni. Mizoram CM Adviser meuhin ukil hna leh Adviser to CM office zahawmna vawng him thei lo khawpa MDC uirete tana High Court-a a ding mai hi a zahthlak kan ti a, hetianga bàwl theih adviser, kan Mizoram CM-in a nei hi pawi kan ti hle a ni," an ti.

Lai DCC chuan, Adviser to CM Office dawhkân leh ukil hna a zahawm zawkna turin tun hnuah eng court case-ah mah CM adviser ni chung chuan ukil hna thawka court-a inlan tawh loh ni se an duh thu an tarlang a; C Lalramzauva chu ukil hna a thawk duh a nih chuan Adviser to CM hna bànsan turin an ràwn a ni.