MR zirtirtu laknaah interview an la zo lo A tlingte appoinment pek vat a ni dawn - Education department

Mizoram sorkarin muster roll (MR)-a thawk tur zirtirtu 881 lakna an kalpui mekah personal interview an la zo lo. School Education department hotute chuan, interview zawh a nih veleh zirtirtu atana tlingte chu appointment pek vat an nih tur thu an sawi.

Vanglaini palai zawhna chhangin School Education department hotute chuan, MR zirtirtu tur lakna interview chu district pali - Champhai, Kolasib, Serchhip leh Mamitah chuan zawh a nih tawh thu an sawi a, "Aizawl leh Lunglei district-ah chuan diltu an tam avangin interview zawh a la ni lo," an ti. Lawngtlai leh Siaha chu autonomous district council huam chin a nih avangin MR zirtirtu tur lak a ni ve lo.

School Education department hotute chuan, zirtirtu indaih lohna avangin sorkarin MR zirtirtu lak tur hi a rang lama tihfel a duh thu sawiin, "Zirtirtu lak hna hi district thuneitute kutah dah vek a ni. Anni lamin a ti ṭhate an thlan hnuah Directorate-ah result an rawn thawn ang a, director hmingin appointment pek an ni ang. Tihfel a nih hunah a rang lamin appoinment pek tur a ni," an ti.

Education department hotute sawi danin, MR zirtirtu lak turah hian an thawhna sikul tur tarlan nghal a ni a, a khaw mite duhsak an ni dawn. A khaw mite zinga dil an awm loh chuan a khaw bulhnaia mite duhsak tur a ni. Zirtirtu lak turah hian MTET paltlang kher a ngaih loh laiin, B.Ed emaw, D.El.Ed. emaw zo tawh nih a ngai a; written exam awm loin, personal interview hmanga lak tur a ni.

MR zirtirtute chu skill-II an ni dawn a, thla khatah Rs. 15,600 an hlawh dawn. MR dangte chu dah nghet turin an thawh hun chhung kum bituk a awm ṭhin laiin, MR zirtirtute erawh dah ngheh theih an ni ve dawn lo.