Independence Day ropui taka lawm a ni

Aizawla Independence Day (I-Day) vawi 73-na lawmnaah hian zing dar 8-ah Chief Minister-in hnam puanzar a pawt pharh a, parade contingent-te'n hnam puanzar chibai an bûk a chháng lêt. Zoramthanga chuan, zalenna sualtute inpekna leh an tawrhnate zah thiam a pawimawh thu sawiin, "Zalenna sualtute inpumpekna leh mahni hmasial loa an inhlan avangin hma lam hun thlamuang takin kan suangtuah thei a ni," a ti.

Chief Minister chuan, Mizoram mipuite'n sorkar tharah rinna an nghat tih sawiin, lawmthu a sawi a, "Thla riat chauha upa he sorkar hian hmasawnna tam tak a thawk hman a, kan khawtlang leh ram chhunga thu inchuh leh inhnialna tam tak a chingfel hman a ni," a ti a; hmasawnna hnathawh dâltu reng reng chu sorkarin an sut tlang zel tur thu a sawi.

Raw (rua) chîn leh a tihpuitlin chu SEDP hnuaia programme pawimawh ber pakhat a nih thu sawiin Zoramthanga chuan, "Heta tan hian raw chi hnih Brandisii leh Latifloras chu chîna tihpun theihin a awm tawh. Heng raw lian pui pui pahnih, teh kuala inches 15-20 inkar leh ft. 50 chuanga sangte hi tunah tissue culture-in a chî siama kûi ṭiah mek a ni. Hengte hi a tam thei ang ber sorkarin chìna siam chhuah a tum," a ti.

Chief Minister sawi danin, Mizoram sorkarin Indo-Myanmar insumdawn tawnna a ngai pawimawh hle a, Border Haat sakna tur hmun pali - Hnahlan, Zote, Vaphai (Saikhumphai) leh Sangau (Pangkhua)-ahte hmun thlan a ni tawh. Hemi atan hian ram pahnihte'n memorandum of understanding leh mode of operation an ziak tawh a ni.

Mizoram chu hmasawnna kawng zawh turin a inbuatsaih mek tih sawiin CM Zorama chuan, "Ram ropuia kan siam theih nan tumruhna nen hma lam i pan zel ang u," a ti. Chief Minister chuan Mizoram sorkarin hmasawnna hna a thawhte leh hmachhawp a neih chi hrang hrang a sawi a; zirna, rálmuanna, khawtlang nun nuam leh hriselna kawngahte state dang entawn tlaka Mizoram siam tura thawhpuiah mipui sáwmin, "Vawiin kan neih theih nana nunna hlântu kan mi huaisente hre reng ila, kan ram tan theihtawp i chhuah ang u," a ti a; lungrual taka hma lam pan zel turin Mizo mipui a ngen.

Lammuala I-Day lawmnaah hian parade contingent 32-in hnam puanzar chibak an bûk a, parade contingent zingah hian state páwn aṭangin pakhat 11th Nagaland Armed Police-te an tel a ni. I-Day lawmnaah hian Assembly speaker Lalrinliana Sailo, deputy speaker Lalrinawma, MLA-te leh sorkar official-te an tel a; Lammuala hun hman zawhah Raj Bhavan-ah sáwm bikte'n thingpui ruai an kîlho a ni.

Armed Contingent

    1-na    90th Bn. BSF

    2-na    1st Bn. MAP

    3-na    225th Bn. CRPF

Unarmed Contingent

    1-na    1 Mizo Bn. NCC (T Romana College)

    2-na    1st Bn. MAP School Scouts & Guides

    3-na    1st Bn. MAP School Cubs and Bulbuli

School Contingent

    1-na    Nazareth Higher Secondary School

    2-na    Home Mission School

    3-na    Helen Lowry Higher Secondary School