CKṬP-in HIV/AIDS zirhona a buatsaih

Central KṬP chuan nimin khan Mission Veng Kohhran Hall-ah HIV/AIDS chungchang zirhona, Trainers' Training on HIV/AIDS an buatsaih a, Mizoram hmun hrang hrang aṭangin KṬP hruaitu mi 300 chuang an tel.

Chawhma lam inkhawm chu CKṬP assistant leader Upa Rosangliana'n a kaihruai a, Dr Ruth Lalmuanpuii, Kulikawn Hospital paper zirho a ni. Chawhnu lam inkhawm chu CKṬP Committee member K Lalengzama, HIV/AIDS Sub-Committee chairman-in a kaihruai a; Synod Hospital Grace Home-a Dr RL Sanghluna paper zirho a ni thung. Sawihona leh zawhna leh chhanna hun hman a ni bawk.

Trainers' Training on HIV/AIDS-ah hian Central KṬP hruaitute bakah, Aizawl khawpui chhunga KṬP branch 169 aṭangin aiawh pakhat ṭheuh leh Aizawl páwn lama pastor bial 161 aṭangin aiawh pakhat ṭheuh tel tura beisei an ni. Aizawl chhunga branch aiawh 161 leh Aizawl páwn lama bial KṬP aiawh 124 telin, mi 285 an ni a; CKṬP hruaitute leh resource person-te mi 320 vel an tel a ni.

CKṬP general secretary T.Upa Rochungnunga chuan, kum 2019-a KṬP Rorel Inkhawmah HIV/AIDS donaa hmalak rèl a nih thu sawiin, nimina Trainers' Training pawh rorel bawhzuina a nih thu a sawi a, "Tun ṭum Trainers' 

Training-a rawn telte hi branch leh bial hruaitute an ni a, a ṭul angin an branch leh bial chhunga KṬP member-te hnenah HIV/AIDS hlauhawmzia leh a inven dante sawi chhâwng thei tura beisei an ni," a ti.